އެމްޑީޕީގެ ޤައުމީ މަޖިލީހުގެ ދާއިރާތަކުގެ ބައި-އިލެކްޝަންގެ ވޯޓުލުން ފަށައިފިއެވެ. 

މިއަދު ބާއްވާ ބައި-އިލެކްޝަންގެ ވޯޓު ނެގުން ކުރިޔަށް ގެންދިޔުމަށް ހަމަޖައްސާފައި ވަނީ، މެންދުރު ފަހު 2:30 އިން ރޭގަނޑު 9:00 އަށެވެ.

މިއަދު ކުރިޔަށް ދަނީ، އެމްޑީޕީގެ ޤައުމީ މަޖިލީހުގައި ހިމެނޭ 19 ދާއިރާއެއްގެ ރައީސުންނާއި، ދެ ސިޓީއެއްގެ ރައީސުން ހޮވުމަށް ބާއްވާ ބައި އިލެކްޝަންގެ ވޯޓު ނެގުމެވެ. މިއިންތިޚާބުގައި 54 ކެންޑިޑޭޓުން ވާަދަކުރެއެވެ. އެންމެ ގިނަ ކެންޑިޑޭޓުން ކުރިމަތިލާފައި ވަނީ، ހުރާ ދާއިރާއަށެވެ. އެދާއިރާއަށް 6 ކެންޑިޑޭޓުން ކުރިމަތިލާފައި ވެއެވެ.

ސިޓީ ތަކުގެ ރައީސުން ހޮވުމުގެ ބައި އިލެކްޝަން ބާއްވަނީ، މާލެ އަށާއި، ތިނަދޫ އަށެވެ. މާލެ ސިޓީގެ ރައީސް ކަމަށް ކުރިމަތި ލައްވާފައި ވަނީ، މާލެ ސިޓީގެ މޭޔަރު އާދަމް އާޒިމް އާއި އެމްޑީޕީގެ ކުރީގެ މަޖިލިސް މެމްބަރު މުޙައްމަދު ފަލާޙެވެ.

ތިނަދޫ ސިޓީގެ ރައީސް ކަމުގެ މަޤާމަށް ކުރިމަތިލައްވާފައި ވަނީ، ޢަބްދުލްމުޣުނީ އާއި އަޙްމަދު ޤައިސްއެވެ.