ނ. ހެނބަދޫ ޕޮލިސް ޑެސްކުގައި މަސައްކަތް ކުރަމުންދާ ފުލުހެއްގެ ސައިކަލަށް ގެއްލުންދީ، އެހެން ފުލުހެއްގެ ސައިކަލެއް ރޯކޮށްލައިފިއެވެ.

އެގޮތުން ބުދަ ދުވަހުގެރޭ ފުލުހެއްގެ ސައިކަލުގެ މަޑީގައި ކަޓަރު އެޅުމަށްފަހު، ބުރާސްފަތި ދުވަހުގެ ރޭ ވަނީ އެހެން ފުލުހެއްގެ ސައިކަލުގައި ރޯކޮށްލާފައެވެ. ރޯކޮށްލި ސައިކަލު ވަނީ އެއްކޮށް އަނދާ ހުލިވެފައެވެ.

މި މައްސަލައާ ގުޅިގެން، ފުލުހުންގެ ތަރުޖަމާނު އަޙުމަދު ޝިފާން "އެކްސް" ގައި ކޮށްފައިވާ ޕޯސްޓެއްގައި ބުނެފައިވަނީ، މިކަމަކީ ނޫނު އަތޮޅުގައި ފުލުހުން ހިންގަމުންދާ މަސްތުވާތަކެތީގެ އޮޕަރޭޝަނަކާއި ދެކޮޅަށް އެކަމުގައި ތުހުމަތު ކުރެވޭ ބަޔަކު ކޮށްފައިވާ ކަމެއްކަމަށް ތުހުމަތުކުރެވޭ ކަމަށެވެ.

ޝިފާން ހާމަކޮށްފައިވާ ގޮތުގައި، އެ ފަދަ އަމަލެއްގެ ސަބަބުން ފުލުހުންގެ ހިތްވަރާއި ސާބިތުކަމަށް ބަދަލެއް ނާންނާނެއެވެ.

މި މައްސަލައާ ގުޅިގެން އެއްވެސް މީހަކު ހައްޔަރުކޮށްފައިވާކަމަކަށް އަދި ފުލުހުން ހާމައެއް ނުކުރެއެވެ.

މި ހާދިސާއާ ގުޅިގެން އެ ރަށުން ވާހަކަ ދެއްކި މީހަކު ބުނީ، މިފަދަ ހާދިސާ ތަކަކީ ވަރަށް ސީރިއަށް ކަމެއް ކަމަށާއި، ފުލުހުންނާއި ދެކޮޅަށް މިފަދަ އަމަލެއް ހިންގުމަކީ ފުލުހުންގެ ހުރިހާ ރިސޯސްއެއް ބޭނުންކޮށް، މިފަދަ ކަންކަން ހުއްޓުވަން ވަގުތުން ފިޔަވަޅު އަޅަން ޖެހޭނެ ކަމެއް ކަމަށެވެ. އަދި މި ހާދިސާއިން ރަމްޒުކޮށްދެނީ، ހެނބަދޫގައި ފުލުހުންނާއި ފުލުހުންގެ އާއިލާތަށް ބިރުވެރިކަމަށް ހުށަހެޅިފައިވާ މިންވަރުކަމަށް ވެސް، ނަން ހާމަ ނުކުރުމަށް އެދި އެ ރަށުން ވާހަކަ ދެއްކި މީހާ ބުންޏެވެ.