މި ހަފްތާގެ ބުދަ ދުވަހުގެ ރޭގެ ވަގުތެއްގައި މާލޭގެ މަގުމަތީގައި މާރާމާރީ ހިންގި 6 ބިދޭސީން ޑީޕޯޓުކޮށްލުމަށް މޯލްޑިވްސް އިމިގްރޭޝަނުން ނިންމައިފިއެވެ.

މިކަން ހާމަކޮށް އިމިގްރޭޝަނުގެ ރަސްމީ ސޯޝަލް މީޑިއާ އެކައުންޓުތަކުން ކުރި ޕޯސްޓުގައި ބުނީ، މާލޭގައި ހިނގި މާރާމާރީއަކާ ގުޅިގެން 6 ބިދޭސީއަކު ފުލުހުން ވަނީ ބުރާސްފަތި ދުވަހުގެރޭ އިމިގްރޭޝަނާއި ހަވާލުކޮށްފައިވާ ކަމަށާއި، އެމީހުން ޑީޕޯޓު ކޮށްލުމަށް ކޮންޓްރޯލާރ ޖެނެރަލް ނިންމަވާފައިވާކަމަށެވެ.

އިމިގްރޭޝަނުން ކުރި ޕޯސްޓުގައި ބިދޭސީންގެ ފޮޓޯއާއި އުމުރު ހާމަކޮށްފައިވެއެވެ. ނަމަވެސް އެމީހުންގެ ގައުމީ ނިސްބަތް އާންމު ކޮށްފައެއް ނުވެއެވެ.

މި މާރާމާރީއާ ގުޅިގެން ޑިޕޯޓު ކޮށްލަން ނިންމާފައިވާ ބިދޭސީންގެ ތެރޭގައި ހިމެނެނީ މުޅިން ވެސް ފިރިހެނުންނެވެ. އެއީ އުމުރުން 26 އަހަރުގެ މީހަކާއި، 27 އަހަރުގެ މީހަކާއި، 29 އަހަރުގެ ދެ މީހުނާއި، 38 އަހަރުގެ މީހަކާއި އަދި 40 އަހަރުގެ މީހެކެވެ.