އެމްޑީޕީގެ ޤައުމީ މަޖިލީހުން ހުސްވެފައިވާ މަޤާމުތަކަށް މެމްބަރުން އިންޚާބުކުރުމުގެ ވޯޓު ނެގުން މިއަދު ބާއްވާއިރު، މި އިންތިޚާބުގައި، އެމްޑީޕީ ގައުމީ މަޖިލީހުގެ ގަލޮޅު އުތުރު ދާއިރާގެ ރައީސްގެ މަގާމަށް ވާދަކުރައްވާ ޒުވާން ކެންޑިޑޭޓަކީ، ގާނޫނީ ވަކީލު، އައިކް އަހްމަދު އީސައެވެ. 

އުމުރުން 18 އަހަރުންފެށިގެން އެމްޑީޕީއާ ގުޅިވަޑައިގެންނެވި، އައިކުގެ އަމާޒަކީ، ސިޔާސީ ގޮތުން ބަދަލުވެފައިވާ މިޒަމާނުގައި އެމްޑީޕީގެ ކުރިމަގު އަލުން އުޖާލާކޮށް ޒުވާނުންގެ ބާރުވެރިކަމާއި ވިސްނުން ފުޅާކޮށް ޕާޓީއަށް އިތުރު ކުރިއެރުން ހޯދައި ދިނުމެވެ. އެމްޑީޕީގެ އެތެރޭގެ ބައިބައިވުންތަކުން ނުކުތް ނަތީޖާއެއްގެ ގޮތުގައި، ބޮޑު ދެ އިންތިޚާބު (ރިޔާސީ އިންތިޚާބާއި މަޖިލިސް އިންތިޚާބު)ގައި އެމްޑީޕީއަށް ކުރިމަތިވި ނާކާމިޔާބީއާއެކު ޕާޓީގެ ކުރިމަގާއި މެދު ސުވާލު އުފެދުނު މިދަނޑިވަޅުގައި އެމްޑީޕީއާއިގެން ދެން ކުރިޔަށް ދާންވީ ޒުވާނުން ކަމުގައި، އަދި އެފުރުޞަތު ލިބެންވީ ޒުވާނުންނަށް ކަމުގައި އައިކު ފާހަގަކުރިއެވެ.

އައިކު ފާހަގަކުރި ގޮތުގައި ސިޔާސީ މައިދާނުގައި، މިއަދު ހަރަކާތްތެރިވާ ޒުވާނުންނަށް ފުރުޞަތުތައް ލިބެންޖެހޭ ދުވަހަކީ މިއަދެވެ. ސިޔާސީ މައިދާނުގައި ތިބި ޤާބިލް، ހީވާގި ޒުވާނުން ތިބެން ޖެހޭނީ މާދަމާގެ އިންތިޒާރުގައެއް ނޫނެވެ.

މިއަދު ޤައުމުގެ ކުރިމަގާއި ޕާޓީތަކުގެ ކުރިމަގާއި މެދު ގޮތް ނިންމާން ވޯޓުދޭން ތިބި ބަޔަކީ، ޒުވާނުންނެވެ. ޒުވާނުންގެ މައްސަލަތަކާއި ޒުވާނުން ބޭނުންވާ ގޮތްތަކާއި ޒުވާނުންގެ ކުރިމަގު ބިނާކުރުމަށް ސިޔާސަތުތައް އެކަށައެޅުމަށް ބޭނުން ވަނީ އެ މައުލޫމާތު އެނގޭ ބައެކެވެ.

އައިކު ފާހަގަ ކުރި ގޮތުގައި ޕާޓީގެ އެކި ހަރަކާތްތަކުގައި އިސްވެ މަސައްކަތް ކުރާ އަދި މަސައްކަތް ކުރަން ތިބި ބަޔަކީ، ޒުވާނުންނެވެ. ޤާނޫނީ ވަކީލެއްގެ ހައިސިއްޔަތެއް އައިކުއަކީވެސް މިއަދު ޕާޓީ ތަމްސީލުކުރުމުގެ ޒިންމާ އެންމެ ބޮޑަށް އުފުލާ ޒުވާނެކެެވެ. ޕާޓީގެ ފަރާތުން ކޯޓުތަކުގައި ވަކާލާތުކޮށް ޕާޓީގެ ހައްޤުތައް ނެގެހެއްޓުމަށާއި، ޕާޓީގެ މެމްބަރުންގެ ވަޒީފާގެ ހައްޤުތައް ކަށަވަރުކޮށްދިނުމުގައި ކޯޓުތަކާއި ޓްރައިބިއުނަލުގައި މިހާރުވެސް އައިކު އަންނަނީ މަސައްކަތް ކުރަމުންނެވެ. 

އައިކު އެމްޑީޕީގެ ޒުވާނުންނާއި އެކުގައި --

އެމްޑީޕީގެ ޤައުމީ މަޖިލީހުގައި، މިހާތަނަށް އެތައް ދާއިރާއެއްގެ މެމްބަރުންގެ މަޤާމު ހުސްވެފައި އޮތުމަކީވެސް، ޕާޓީ ހިންގުމަށް އޮތް ދަތިކަމެއްކަމުގައި އައިކު ފާހަގަކުރިއެވެ. އޭގެ އިތުރުން ޤައުމީ މަޖިލީހުގެ ބައްދަލުވުންތަކާއި ޖަލްސާތަކަށް، އެކަށީގެންވާ ގޮތެއްގައި މެމްބަރުންނަށް ހާޟިރު ނުވެވޭކަންވެސް އައިކު ފާހަގަކުރިއެވެ.

އައިކު އަކީ، އެމްޑީޕީގެ އިސްތިއުނާފު ފަނޑިޔާރުންގެ މަޖިލީހާއި ލީގަލް އެފެއާޒް ކޮމިޓީ އާއި، ދިރާސާ ކޮމިޓީގެ މެންބަރުކަމުގެ އިތުރުން ޔޫތު އެންޑް ރިސޯސް ކޮމެޓީގެ ޑެޕިއުޓީ ޗެއާއެވެ. އެހެން ނަމަވެސް އެމްޑީޕީއާއި މެދު ބަސްބުނެވޭ މަޤާމަކީ އެމްޑީޕީގެ ޤައުމީ މަޖިލިސް ކަމުގައި ވުމާއި އެކު، އެމްޑީޕީ ގައުމީ މަޖިލީހުގެ ގަލޮޅު އުތުރު ދާއިރާގެ ރައީސްގެ ގޮތުގައި ޕާޓީީގެ ކުރިމަގު ބިނާކުރުމުގެ މަސައްކަތަށް ނުކުތުމަކީ އައިކުގެ އަމާޒެވެ.