2024ވަނަ އަހަރުގެ އަދަބީ ކަލަންޑަރުގައި ދިވެހިބަހުގެ އެކެޑަމީން ހިމަނައިގެން، މިހަފްތާގެ ހުކުރު ދުވަހާއި، ހޮނިހިރު ދުވަހު ބޭއްވުމަށް ނިންމާފައިވާ އަދަބީ މުބާރާތްތައް ފަސްކޮށްފިއެވެ.

2024ވަނަ އަހަރުގެ އަދަބީ ކަލަންޑަރުގައި ދިވެހިބަހުގެ އެކެޑަމީން ހިމަނައިފައިވާ މުބާރާތްތަކުގެ ތެރެއިން އަލްއުސްތާޛު މުޙައްމަދު ޖަމީލު ދީދީގެ ހަނދާނީ ވާދައިގެ ތަށްޓަށް ބާއްވާ މަޒުމޫނު ލިޔުމުގެ 39ވަނަ ޤައުމީ މުބާރާތާއި އައްޝައިޚް މަލިމް މޫސާ މާފަތްކަލޭފާނުގެ ހަނދާނީ ވާދައިގެން ތަށްޓަށް ބާއްވާ ކުރުވާހަކަ ލިޔުމުގެ 36ވަނަ ޤައުމީ މުބާރާތާއި ހުތްޢަލިދީދީގެ ވާދައިގެ ތަށްޓަށް ބާއްވާ ޅެންހެދުމުގެ 27ވަނަ ޤައުމީ މުބާރާތް ބޭއްވުމަށް ނިންމާފައި ވަނީ އޮގަސްޓް މަހުގެ 2ވާ ހުކުރު ދުވަހުގަޔާއި، އޮގަސްޓް މަހުގެ 3 ވާ ހޮނިހިރު ދުވަހުގައެވެ.

ޤައުމީ މަޒުމޫނު ލިޔުމުގެ ޤައުމީ މުބާރާތާއި ކުރުވާހަކަ ލިޔުމުގެ ޤައުމީ މުބާރާތާއި ޅެން ހެދުމުގެ ޤައުމީ މުބާރާތަށް ސްކޫލުތަކުގެ ދަރިވަރުންނާއި އަމިއްލަ ގޮތުން ބައިވެރިވި ފަރާތްތަކުން ތައްޔާރުވެ، މުބާރާތް ބާއްވާ ތާރީޚަށް އެއް ދުވަހަަށް ވެފައި ވަނިކޮށް، ޖުލައި 31 ވީ ބުދަ ދުވަހު، ދިވެހިބަހުގެ އެކެޑަމީން ވަނީ މުބާރާތްތައް ފަސްކުރިކަން ސްކޫލުތަކަށް އަންގާފައެެވެ. އަދި މުބާރާތްތައް ބާއްވާ ތާރީޚު ފަސްކުރި ނަމަވެސް އަލުން މުބާރާތްތައް ބާއްވާނެ ތާރީޚެއް އެކަޑަމީ ކަނޑައަޅާފައެއް ނުވެއެވެ.

މުބާރާތްތައް ފަސްކުރިކަން އަންގައި، އެކަޑަމީން ސްކޫލުތަކާއި ކައުންސިލްތަކަށް ފޮނުވި މެސެޖުގައި ބުނެފައި ވަނީ، މުބާރާތްތައް ބޭއްވޭތީ ކުރަން ހުރި ހުރިހައި މަސައްކަތްތަކެއް ކަމާއި، ގުޅުން ހުރި ހުރިހައި މުއައްސަސާތަކާއި ގުޅިގެން ކުރަމުން ގެންދާ ކަމަށެވެ. އަދި މުބާރާތް ފަސްކުރުމުގެ ސަބަބުން ދިމާވާ ދަތިތަކަށްޓަކައި އެކަޑަމީން ވަނީ މަޢާފަށްވެސް އެދިފައެވެ.

ދިވެހި ބަހުގެ އެކަޑަމީގެ ރައީސް އަޝްރަފް ޢަބްދުއްރަހީމް ވިދާޅުވީ، މުބާރާތްތައް ފަސްކުރަން ޖެހުނީ، އިދާރީ ގޮތުުން ކުރަން ހުރި ބައެއް މަސައްކަތްތައް ހުރުމުގެ ސަބަބުން ކަމަށާއި، މުބާރާތްތައް އަލުން ބާއްވާނޭ ތާރީޚެއް ވަރަށް އަވަހަށް އިޢުލާނު ކުރާނޭ ކަމަށެވެ.

ދިވެހިބަހުގެ އެކަޑަމީން ހާމަކުރައްވާފައިވާ ގޮތުގައި، މިއަހަރުގެ އަދަބީ މުބާރާތްތަކުގައި ސްކޫލު މަދަރުސާތަކުގެ ދަރިވަރުން ހިމެނޭ ގޮތުން 2400 ވުރެ ގިނަ ފަރާތުން މުބާރާތްތަކުގައި ބައިވެރިވެފައިވެއެވެ.