ގދ. ތިނަދޫގައި ފެން އުފެއްދުމަށް ބޭނުންކުރާ ޕްލާންޓަށް ދިމާވި މައްސަލަ ކޮންމެވެސް ވަރަކަށް ހައްލުކޮށް، އެޕްލާންޓް ހިންގަން ފަށާފައިވާ ކަމުގައި ފެނަކަ ކޯޕަރޭޝަންގެ މެނޭޖިންގ ޑައިރެކްޓަރ މުއާޒު މުހައްމަދު ރަޝީދު ވިދާޅުވެއްޖެއެވެ.

މުއާޒު މިހެން ވިދާޅުވީ އެކުންފުނީގެ މަސައްކަތްތަކާއި ގުޅޭ ގޮތުން މީޑިއާތަކަށް މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ. އޭނާ ވިދާޅުވީ، ތިނަދޫއަށް ފެނުގެ ޚިދުމަތް ފޯރުކޮށްދެވެމުން ދިޔަ ނަމަވެސް ޕްލާންޓަށް ދިމާވި މައްސަލަ މިހާތަނަށް މުޅިން ހައްލުކުރެވިފައި  ނުވާކަމަށެވެ.

ފެނަކަ ކޯޕަރޭޝަނަށް ކުރިމަތިވެފައިވާ ދަތިތަކުގެ މައްޗަށް އަލިއަޅުއްވާލައްވައި، މުއާޒު ވިދާޅުވީ، ފެން ޕްލާންޓްތައް ބަހައްޓައިގެން ފެނުގެ ޚިދުމަތް ދެމުން އަންނަ ރަށްރަށުގައި އެކަށީގެންވާ ކެޕޭސިޓީއެއް ޤާއިމްކުރެވިފައި ނެތުމުގެ ސަބަބުން ކުރިމަތިވެފައިވާ ގޮންޖެހުންތައް ބޮޑު ކަމަށެވެ. މިގޮތުން އެކުންފުނީގެ ފަރާތުން ފެނުގެ ޚިދުމަތް ފޯރުކޮށް ދެމުން އަންނަ، ދ. ކުޑަހުވަދޫ އާއި، ތ. ގުރައިދޫ އާއި، ގއ. ވިލިގިއްޔާއި ގދ. ތިނަދޫގެ އިތުރުން އައްޑޫ ސިޓީ ހިތަދޫގައިވެސް، ޔުޓިލިޓީ ރެގިއުލޭޓަރީ އޮތޯރިޓީން ކަނޑައަޅާފައިވާ މިންގަނޑުތަކަށް ކެޕޭސިޓީ އިތުރު ކުރެވިފައި ނެތްކަން މުއާޒު ފާހަގަކުރެއްވިއެވެ.

މުއާޒު ވިދާޅުވީ، ފެނުގެ ނިޒާމްގެ ކަންތައްތައް ހުރީ، ޕްލާންޓަކަށް ކަމެއް ދިމާވާއިރަށް، ދާދި އަވަހަށް ރައްޔިތުންނަށް  ޚިދުމަތް މެދު ކެނޑިގެންދާ ގޮތަށް ކަމަަށެވެ. އަދި ޔޫ.އާރް.އޭގެ މިންގަނޑާއި ޚިލާފަށް މިހުރިހާ ޒަމާންތަކެއްގައި، ހުރިހާ ސަރުކާރެއްގައި ހުރިހާ މެނޭޖްމެންޓްތަކަކުންވެސް އެކަންތައްތަކަށް އަޅާނުލައި، ދޫކޮށްލާފައި އޮތް އޮތުމަކީ ވަރަށް ބޮޑު ކަންބޮޑުވުމެއް ކަމަށެވެ. 

ތިނަދޫގައި، ފެނުގެ ނެޓްވޯކް ޤާއިމްކޮށް ޚިދުމަތް ފަށާފައި ވަނީ 2014 ވަނަ އަހަރުގައެވެ.