ހުޅުމާލެ ދެވަނަ ފިޔަވަހީގެ ވިނަރެސް ފްލެޓްތައް ކައިރީގައި ބުދަ ދުވަހުގެ މެންދުރުފަހު ކާރެއް ކޮންޓްރޯލް ނުވެ ހިނގި އެކްސިޑެންޓަށްފަހު، ފިލައިގެން ދިޔަ ކާރު ޑުރައިވަރުގެ އިތުރުން، އެ ކާރުގައި ތިބި އިތުރު ދެ މީހަކު ހައްޔަރުކޮށް އެންމެންގެ ވަނަވަރު ފުލުހުން އާންމު ކޮށްފިއެވެ.

މި އެކްސިޑެންޓު ހިނގި މަންޒަރު ފެންނަ ވީޑިއޯ ސޯޝަލް މީޑިއާގައި އިއްޔެ ހަވީރު ފެތުރިފައިވާ އިރު، ވީޑިއޯ އިން ފެންނަ ގޮތުގައި މި އެކްސިޑެންޓު ހިނގާފައިވަނީ  ކާރު ކޮންޓްރޯލުން ނެއްޓިގެންނެވެ. އެގޮތުން އެންމެ ފުރަތަމަ ކާރު ގޮސް އަރާފައިވަނީ ރޯޑް ޑިވައިޑާއެއްގެ ގޮތުގައި ހަދާފައިވާ ތަނަށެވެ. އަދި އެއަށްފަހު މަގުގެ ހުޅަނގު ފަޅިން އަރިމައްޗަށް ސައިކަލުގައި މަޑުކޮށްލައިގެން އިން މީހެއްގެ ގައިގައި ޖެހި، އޭނާ ވިއްސައިގެން ގޮސް ބޮޑެތި އަނިޔާތަކެއް އޭނާއަށް ވަނީ ވެފައެވެ.

އެކްސިޑެންޓަށްފަހު ކާރު ދުއްވަން އިން ޑުރައިވަރު ވަނީ ފިލާފައެވެ. ނަމަވެސް އޭނާ ހޯދާ ހައްޔަރުކޮށްފައިވާކަމަށް، ބުދަ ދުވަހުގެ އިރުއޮއްސުނުފަހުން ފުލުހުން ހާމަކުރިއެވެ. އަދި އޭގެ ފަހުން، ކާރުގައި ދެން ތިބި ދެ މީހުން ހައްޔަރުކޮށްފައިވާކަމަށް ރޭ ދަންވަރު ފުލުހުން ވަނީ ބުނެފައެވެ.

އެކްސިޑެންޓާ ގުޅިގެން ހައްޔަރުކުރި މީހުން؛

1.    އިކްރާމުއްރަހުމާން، ހ. ނޫރަންމާގެ

2.    އިބްރާހިމް އިކްރާމް، މ. ލޭންޑް އޮފް ގާޑަން

3.    ޖިނާހު އިސްމާއީލް، އާޒާދުގެ، ގއ. ކަނޑުހުޅުދޫ

މި ތިން މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

އަދި މި އެކްސިޑެންޓުގައި އަނިޔާވި މީހާ ފަރުވާ ހޯދަމުން ދަނީ އައިޖީއެމްއެޗްގައެވެ.