ހުޅުމާލެ ދެވަނަ ފިޔަވަހީގެ ވިނަރެސް ފްލެޓްތައް ކައިރީގައި، މިއަދު ކާރެއް ކޮންޓްރޯލް ނުވެ ހިނގި އެކްސިޑެންޓަށްފަހު، ފިލައިގެން ދިޔަ ކާރު ޑްރައިވަރު ހޯދައި ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، އެމީހާ ހައްޔަރުކޮށްފައި ވަނީ ކޯޓުއަމުރެއްގެ ދަށުން ކަމަށެވެ. އޭނާއަކީ އުމުރުން 25 އަހަރުގެ ދިވެހި ފިރިހެނެއް ކަމުގައި ފުލުހުންގެ އިދާރާއިން ވިދާޅުވިއެވެ. 

މިއަދު މެންދުރު ހިނގި އެ އެކްސިޑެންޓްގެ މަންޒަރު ފެންނަ ސީސީޓީވީ ވީޑިއޯ ފްޓޭޖު ސޯޝަލް މީޑިއާގައި ދަނީ ދައުރު ވަމުންނެވެ. އެ ވީޑިއޯއިން ފެންނަ ގޮތުގައި ކާރު ކޮންޓްރޯލުން ނެއްޓުނީ، ރޯޑް ޑިވައިޑާއެއްގެ ގޮތުގައި ހަދާފައިވާ ތަނުގައި ޖެހުމަށް ފަހުގައެވެ. އަދި ކާރު ކޮންޓްރޯލުން ނެއްޓިގެން ދިޔަ ވަގުތު މަގުގެ ހުޅަނގު ފަޅިން އަރިމައްޗަށް ސައިކަލު މަޑުކޮށްލައިގެން އިން މީހެއްގެ ގައިގައި ކާރުން ޖެހި އޭނާ ވިއްސައިގެން ގޮސް ބޮޑެތި އަނިޔާތަކެއް ވެފައިވެއެވެ.

ހާދިސާ ހިނގި އިރު އެކާރުގައި، 3 މީހަކު ތިބި ކަމަށްވެއެވެ. އޭގެ ތެރެއިން މިރޭ ހައްޔަރުކޮށްފައި ވަނީ، ކާރު ދުއްވަން އިން މީހާ އެކަންޏެވެ.

ފުލުހުން ގެންދަނީ މިހާދިސާ އިތުރަށް ތަޙްޤީޤު ކުރަމުންނެވެ.