ފުލުހުން އައްޑޫ ސިޓީގައި ހިންގި އޮޕަރޭޝަނެއްގައި، އަންހެނަކު ކޮޓަރިއެއްގައި އޮރިޔާން ހާލުގައި ހުއްޓައި، ފުލުހުން އެ ކޮޓަރީގެ ދޮރުވައްޓާލާފައި ވަތްކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، އައްޑޫ ސިޓީގައި ފުލުހުން ހިންގި އޮޕަރޭޝަނެއްގައި ގެއެއްގެ މައިދޮރާއި އެގޭގެ ދެކޮޓަރީގެ ދޮރު ވައްޓާލައި ފުލުހުން ވަތްކަމަށެވެ. އޭގެ ތެރެއިން އެއްކޮޓަރީގެ ދޮރު ވައްޓާލި އިރު ފެންވަރައިގެން ނުކުތްގޮތަށް އަންހެނަކު ކޮޓަރިތެރޭގައި ހުރިކަމަށެވެ. އަދި ދޮރުވައްޓާލައިގެން ފުލުހުން ވަތް އެކޮޓަރީގައި އަންހެންމީހާ ހުރުމުން، ފުލުން ދޮރު ލެއްޕުމަށްފަހު ކޮޓަރިން ނުކުތުމަށް ފުރުޞަތު ދިންކަމުގައިވެސް ފުލުހުންގެ އިދާރާއިން ވަނީ ބުނެފައެވެ. 

މިހާދިސާގައި، ފުލުހުން ބޭނުންކުރި ބޮޑީވޯން ކެމެރާއަށް އަންހެން މީހާގެ މަންޒަރުތައް ރެކޯޑް ކުރެވުނުކަމުގެ ވާހަކަތައް ސޯޝަލް މީޑިއާގައި ފެތުރުނު ނަމަވެސް ފުލުހުންގެ ރަސްމީ މީޑިއާ ގުރޫޕުގައި ހިއްސާކުރި މައުލޫމާތުގައި ފުލުހުން ވިދާޅުވީ، އެ އޮޕަރޭޝަނުގައި ހަރަކާތްތެރިވި ފުލުހުން ބޮޑީވޯން ކެމެރާ ބޭނުންކޮށްފައި ނުވާކަމަށާއި އަދި، ފާޚާނާއެއްގެ ދޮރުއްވައްޓާލާފައިވެސް ނުވާ ކަމަށެވެ.

ފުލުހުންގެ އިދާރާއިން ވިދާޅުވީ، އައްޑޫ ސިޓީ ހިތަދޫގައި ހިންގި އެ އޮޕަރޭޝަނަކީ، ކޯޓުއަމުރެއްގެ ދަށުން ހިންގި މަސްތުވާތަކެތީގެ އޮޕަރޭޝަނެއް ކަމަށެވެ. އަދި އެ އޮޕަރޭޝަން ހިންގުމުގައި ފުލުހުން ބާރުގެ ބޭނުންކުރި ގޮތް ބެލުމަށް ހަމަޖެހިފައިވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.