ކައުންސިލްތަކުން ލޭންޑް ޔޫސް ޕްލޭން ހެދުމުގައި ދަނޑުވެރިކަމަށް ބިން ކަނޑައެޅުމުގައި، މިހާރު ޢަމަލުކުރަމުން އަންނަ ގޮތްތައް އޮޅުން ފިލުއްވުމަށް ކަމާއި ގުޅުން ހުރި ތިން ދާއިރާގެ ވަޒީރުންނާއި ދަނޑުވެރިކަމާއި ބެހޭ ވަޒީރު ޑރ ޢާއިޝަތު ރަމީލާ ބައްދަލުކުރައްވައިއެވެ.

މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއާ އިން ވިދާޅުވީ، ސަރުކާރުގެ ދަނޑުވެރިކަމުގެ ސިޔާަސަތު ތަންފީޒުކޮށް، އިގްތިސާދީ މަންފާ އެންމެ ފުރިހަމައަށް ދަނޑުވެރިންނަށް ހޯދައި ދިނުމުގައި ދަނޑުވެރިކަން ކުރުމަށް ދިގު މުއްދަތަކަށް ބިން ހާއްސަ ކުރުމަކީ ކޮންމެ ހެން ކުރަންޖެހޭ ކަމެއް ކަމަށެވެ. އެހެންވެ މިނިސްޓަރުގެ މި ބައްދަލުކުރެއްވުންތަކުގެ ބޭނުމަކީ އެކަމަށް މަގުފަހި ކުރުން ކަމުގައިވެސް އެ މިނިސްޓްރީން ހާމަކުރައްވައެވެ.

އެމިނިސްޓްރީން ވިދާޅުވީ، މި ފަދަ ބައްދަލުވުންތަކެއް ކުރިއަށް ގެންދަވަން މިނިސްޓަރ ރަމީލާ ނިންމެވި މައިގަނޑު ސަބަބަކީ ބައެއް ކައުންސިލްތަކުން ދަނޑުވެރިންނަށް ދަނޑުވެރިކަން ކުރުމަަށް ދޫކޮށްފައިވާ ބިންތައް އެކި ބޭނުންތަކަށް ނެގުމުގެ މަސައްކަތް ކުރެވޭތީ، މި ކަމުގެ ސަބަބުން ދަނޑުވެރިންނަށް ކުރިމަތިވަމުން އަންނަ ގެއްލުންތަކަށް ހައްލެއް ހޯއްދަވައި ދެއްވުން ކަމަށެވެ.

އަދި ކައުންސިލުތަކުގެ ލޭންޑްޔޫސް ޕްލޭން ހަދާއިރު ދަނޑުވެރިކަމުގެ ބޭނުމަށް ބިންތަކެއް ޙާއްސަ ކުރުމަކީ ސަރުކާރުގެ ފުޑް ސެކިޔުރިޓީގެ ސިޔާސަތު ދަމަހައްޓަން ވެސް މުހިންމުކަމެއް ކަން މި ބައްދުވުމުގައި މިނިސްޓަރ ރަމީލާ ފާހަގަކުރައްވާފައި ކަމުގައިވެސް އެމިނިސްޓްރީން ހާމަކުރައްވާފައި ވެއެވެ.

ލޭންޑް ޔޫސް ޕްލޭން ހެދުމުގައި ހުރިހާ ފަރާތްތަކެއް ގުޅިގެން ކުރެވޭނެ ކަންކަމާއި ބެހޭގޮތުން މި ބައްދަލުވުމުގައި ވަނީ މަޝްވަރާކުރައްވާފައި ކަމަށާއި، މި ބައްދަލުވުމުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރާއި، މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ތޯރިގް އިބްރާހިމްގެ އިތުރުން، ގެދޮރުވެރިކަމާއި ބިމާއި އުމްރާނީ ތަރައްޤީ އާއި ބެހޭ ވަޒީރު ޑރ ހައިދަރު އަލީ ބައިވެރިވެވަޑައިގެންނެވި ކަމުގައިވެސް، މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއާއިން ވިދާޅުވެފައިވެއެވެ.