ކޭ ޕާކް ރެސިޑެންސް ފްލެޓްތައް ވިއްކުމުގައި މަކަރާއި ހީލަތް ހަދައި ގިނަ ބައެއްގެ އަތުން ފައިސާ އަތުލި މައްސަލައިގައި ދައުލަތުން، ހަސަން މަމްދޫހު (މަންޑޭ)ގެ މައްޗަށް ކްރިމިނަލް ކޯޓުގައި އުފުލާފައިވާ ދައުވާތަކުގެ ޝަރީޢަތްތައް ފަށައިފިއެވެ.

މަކަރާއި ހީލަތުން އެތައް މިލިޔަން ރުފިޔާއެއް އެތައް ބައެއްގެ އަތުން ހޯދުމުގެ ކުށުގައި، ހަސަން މަމްދޫހު (މަންޑޭ) ގެ މައްޗަށް 200 ވުރެ ގިނަ ދައުވާ އުފުލޭނެ ކަަމުގައި ޕްރޮސެކިއުޓަރ ޖެނެރަލް ޙުސައިން ޝަމީމް ހުސްވި އަހަރުގެ ނޮވެމްބަރު މަހުގައި ވިދާޅުވެފައި ވެއެވެ. މަންޑޭގެ މައްޗަށް މިހާތަނަށް 100އަށް ވުރެ ގިނަ ދައުވާ އުފުލާފައި ވާއިރު، އެދައުވާތަކުގެ ތެރޭގައި ހިމެނެނީ، ޓެކުމުގެ 50 ދައުވާއަކާއި، އޮޅުވައިލުމުގެ އަމަލެއް ކުރުމުގެ 50 ދަޢުވާއަކާއި، ސައްހަ ނޫން ލިޔުމެއް ދޫކުރުމުގެ ތިން ދައުވާއެއްގެ އިތުރުން މަނީ ލޯންޑަރ ކުރުމުގެ ދައުވާއެކެވެ.

މިއަދު ކުރިމިނަލްކޯޓުގައި ޝަރީއަތްފަށާފައި ވަނީ، މިމައްސަލައިގައި ދެން ޕީޖީން ދައުވާކޮށްފައިވާ، ރ. އަލިފުށީ ކިނާރާ ޖައިޝަން ސައީދުގެ މައްޗަށް އުފުލާފައިވާ ދައުވާތަކާއިވެސް އެކުގައެވެ. މަންޑޭ އާއި ޖައިޝަންއަކީ މަކަރާއި ހީލަތް ހެދުމުގައި އެކުގައި މަސައްކަތްކޮށްފައިވާ ދެމީހުންނެވެ. ޖައިޝަންގެ މައްޗަށްވެސް ޖުމުލަ 95 ދައުވާއެއް ޕީޖީން ހުށައަޅާފައިވެއެވެ.

އިއްޔެގެ ޝަރީއަތުގެ މަޖިލީހުގައި ވަނީ، މައްސަލައިގައި ތުހުމަތު ކުރެވިފައިވާ ދެ ފަރާތަަށްވެސް ވަކީލުން ޢައްޔަނުކުރުމަށް ފުރުޞަތު ދީފައެވެ. 

މަންޑޭގެ މައްޗަށް ތުހުމަތު ކުރެވުނު މައްސަލަތަކުގަައި ފުލުހުން ވަނީ އޭނާގެ ދިރިއުޅޭ ތަން ބަލައި ފާސްކޮށް އަގުބޮޑު ބައެއް މުދަލާއި ތަކެތިވެސް ގެންގޮސް ފައެވެ.