މިނިވަން ދުވަހުގެ ހާއްސަ ރަސްމިއްޔާތުގައި ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންގެ ޚިދުމަތުގެ އަގު ވަޒަންކުރައްވައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވި ޝަރަފާއި މެޑަލް ޙާޞިލްކުރެއްވި ސްޓެލްކޯގެ 16 މުވައްޒަފުންގެ ޝަރަފުގައި އާދީއްތަ ދުވަހު ސްޓެލްކޯގެ ހެޑް އޮފީހުގައި ޚާއްސަ ޙަފްލާއެއް ބާއްވައިފިއެވެ.

އާދީއްތަ ދުވަހު ބޭއްވި މި ރަސްމިއްޔާތަށް އެ މުވައަޒަފުން ވަޑައިގެންނެވިއިރު، އެ މުވައްޒަފުންނަށް ވަނީ ރަތްދޫލައިގެ މަރުހަބާއެއް ދަންނަވާފައެވެ. އަދި ކޮންމެ މުވައްޒަފަކަށް މާބޮނޑިއެއް ވެސް އަރުވާފައިވެއެވެ.

މި ހާއްސަ ރައްމިއްޔާތުގައި ސްޓެލްކޯގެ މެނޭޖިންގ ޑިރެކްޓަރ ޙުސެއިން ފަހުމީ ވެސް ބައިވެރިވެ ވަޑައިގެންނެވިއެވެ. މި ރަސްމިއްޔާތުގައި ވާހަކަފުޅު ދައްކަވަމުން ހުސެއިން ފަހުމީ ވިދާޅުވީ، ސްޓެލްކޯގެ ޚިދުމަތަކީ ރާއްޖޭގެ އިޤުތިޞާދާއި ގުޅުންހުރި ކަމެއް ކަމަށާއި، އެ ޚިދުމަތް ހީނަރުވުމަކީ އިޤުތިޞާދީ މިނިވަންކަން ހީނަރުވުންކަމަށެވެ. އަދި ޤައުމުގެ އިޤުތިޞާދީ މިނިވަންކަން ޔަޤީން ކުރެވޭނީ ކަރަންތާއި އެކު ކަމަށް ވެސް ފަހުމީ ވިދާޅުވިއެވެ.

ޚިދުމަތްތެރީންނާއެކު ސްޓެލްކޯގެ މެނޭޖިންގ ޑިރެކްޓަރ ޙުސެއިން ފަހުމީ، ފޮޓޯ: ސްޓެލްކޯ

މި ރަސްމިއްޔާތުގައި، ކުންފުނީގެ ޚިދުމަތް އިތުރަށް ފުޅާކޮށް، އިތުރު ފުރިހަމަ ކަމާއިއެކު ރައްޔިތުންނަށް ޚިދުމަތް ފޯރުކޮށްދިނުމަށް ހުރިހާ މުވައްޒަފުންވެސް ހީނަރުކަމެއް ނެތި މަސައްކަތް ކުރެއްވުމަށް ފަހުމީ އިލްތިމާސް ކުރެއްވިއެވެ.