މިސަރުކާރުން އިޢުލާނުކުރި ތަރައްޤީގެ އެންމެ ބޮޑު މަޝްރޫޢުކަމުގައިވާ، ރަސްމާލެ ބިން ހިއްކުމުގެ މަޝްރޫޢު އަލުން ކުރިޔަށް ގެންދަނީ އެއްވެސް ފަރާތަކަށް ހިލޭ ބިން ނުދީ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދިވެހިރާއްޖޭގެ މިނިވަންކަމަށް 59 އަހަރު ފުރުމުގެ މުނާސަބަތު ފާހަގަކުރުމުގެ ގޮތުން ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރަސްމާލެ މަޝްރޫޢާއި ގުޅޭ ގޮތުން ވާހަކަފުޅޅު ދައްކަވަމުން ރައީސް ވިދާޅުވީ، އެމަޝްރޫޢުގެ ބިން ހިއްކުމުގެ މަސައްކަތް މުޅިން ނިންމުމަށް އިތުރު 8 މަސް ދުވަސް ބޭނުންވާ ކަމަށެވެ.  ރައީސުލްޖުމްހޫރިއްޔާ ވިދާޅުވީ، ރަސްމާލެ މަޝްރޫޢަަށް ބޭނުންވާ 11 ހެކްޓަރުގެ ބިން މިހާރު ހިއްކަން ހަމަޖައްސާފައި ވަނީ އެކި ކުންފުނިތަކާއި ހަވާލުކޮށްގެން ކަމަށެވެ. އަދި އެމަސައްކަތުގެ ބަދަލެއްގެ ގޮތުގައި އެއްވެސް ފަރާތަކަށް އެއްވެސް ބިމެއް ކުރު މުއްދަތަކަށްވެސް އަދި ދިގު މުއްދަތަކަށްވެސް ހިލޭ ނުދޭނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރަސްމާލެ މަޝްރޫއު، ކ. ފުށި ދިއްގަރުފަޅުގައި ހިންގުމަށް ނިންމައި އެފަޅު ހިއްކުމުގެ މަސައްކަތް، ޑިސެމްބަރު 18، 2023 ގައި ސަރުކާރުން ފެށީ، ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީސީ) އާއި ހަވާލުކޮށްގެންނެވެ. އެކުންފުންޏަށް ބަދަލުގެ ގޮތުގައި ހުޅުމާލެއިން 10 ހެކްޓަރާއި، ފުށި ދިއްގަރުފަޅުން ހިއްކާ ބިމުން 60 ހެކްޓަރުގެ ބިން ދިނުމަށް އޭރު ސަރުކާރުން ނިންމިއެވެ.

އެމަޝްރޫއު ފެށި ދުވަހު ބިންހިއްކުމުގެ މަސައްކަތް 8 މަސް ދުވަހުގެ ތެރޭގައި ނިމޭނެ ކަމުގައި ރައީސުލްުޖުމްހޫރިއްޔާ އިޢުލާނު ކުރެއްވި ނަމަވެސް އެމަސައްކަތް ނުނިމި ވަނީ ދިގުލައިގެން ގޮސްފައެވެ.