ދައުލަތަށް ލިބެންޖެހޭ ހުރިހާ ފައިސާއެއް ހޯއްދަވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދިވެހިރާއްޖޭގެ މިނިވަންކަމަށް 60 އަހަރުފުރޭ 59 ވަނަ މިނިވަން ދުވަސް ފާހަގަކުރުމަށް މިރޭ ސޯޝަލް ސެންޓަރުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާގެ ވާހަކަފުޅުގައި ވަނީ، ދައުލަަތަށް ލިބެންޖެހޭ އެތައް ބިލިއަން ރުފިޔާއެއް ނުހޯދައި، ކުރީގެ ސަރުކާރު ތަކުން  ދޫކޮށްލާފައިވާ ކަމުގައި ވިދާޅުވެފައެވެ.

ދައުލަތަށް ލިބެންޖެހޭ ފައިސާގެ ބައެއް ތަފްސީލްތައް ޙިއްޞާ ކުރައްވަމުން ރައީސް ވިދާޅުވީ، ޓީޖީއެސްޓީގެ ގޮތުގައި ލިބެންޖެހޭ 102 މިލިއަން އެމެރިކާ ޑޮލަރާއި، ޖީއެސްޓީގެ ގޮތުގައި ލިބެންޖެހޭ 3.3 ބިލިއަން ރުފިޔާ އާއި، ކޯޕަރޭޓް އިންކަމް ޓެކްސްގެ ގޮތުގައި ލިބެންޖެހޭ 1 ބިލިއަން ރުފިޔާ ހިމެނޭ ކަމަށެވެ. މިގޮތުން ދައުލަތަށް ލިބެންޖެހޭ އަދި ކުރީގެ ސަރުކާރުތަކުން ނުހޯދައި ހުރި ފައިސާގެ އަދަދު 13 ބިިލިއަން ރުފިޔާއަށް އަރާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްުޔާ ވިދާޅުވީ، ދައުލަތަށް ލިބެންޖެހި ނުލިބި ހުރި އެއްބައި ފައިސާ މިދިޔަ ހަފްތާގައިވެސް ހޯއްދަވާފައިވާ ކަމަށެވެ. އަދި އެފައިސާ އެފަރާތްތަކުގެ އަތުން ހޯދުމަށްޓަކައި ކޯޓަށް ދާންޖެހޭނަމަ ސަރުކާރުން އެކަންވެސް ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ކޯޓު މަރުޙަލާ އާއި ހަމައަށް ނުގޮސް، އޭގެ ތެރެއިން ދެބައިކުޅަ އެއްބަޔަށްވުރެ ގިނަ ފައިސާ ވިޔަފާރިވެރިން ދައްކަވާނެ ކަމުގައި އުއްމީދު ކުރައްވާކަމަށެވެ. އަދި އެފައިސާ ނުދައްކައި ހުރީ ކުދި ކުދި ވިޔަފާރިތަކުން ނޫންކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.