އއ. ރަސްދޫ ސާހިލް ނަމަކަށް ކިޔާ ގެއެއްގައި ޤަވާއިދާއި ޚިލާފަށް ހިންގަމުންދިޔަ ސްޕާއެއް ރެއިޑްކޮށް އެތަނުގައި ހަށިވިއްކާ ކަމުގެ ތުހުމަތުގައި ބަޔަކު ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، ބްލޫ ވެލި ސެލޫން އެންޑް ސްޕާގެ ނަމުގައި ހިންގަމުން ދިޔަ އެތަނަކީ، މިނިސްޓްރީ އޮފް އިކޮނޮމިކް ޑިވެލޮޕްމެންޓްގައި ރަޖިސްޓްރީކޮށްގެން ހިންގަމުންދާ ތަނެއް ނޫން ކަމަށާއި، އެތަނުގައި ބިދޭސީ އަންހެނުން ބޭނުންކޮށްގެން ހަށިވިއްކަމުންދާކަމުގެ ރިޕޯޓް ފުލުހުންނަށް ލިބިފައިވާ ކަމަށެވެ.

ފުލުހުން ވިދާޅުވީ، ކޯޓުއަމުރެއްގެ ދަށުން ފުލުހުން އެތަނަށް ވަދެ ބިދޭސީ ދެ އަންހެނުންނާއި ބިދޭސީ ފިރިހެނަކު ހައްޔަރުކޮށްފައިވާ ކަމަށެވެ. ފުލުހުންގެ އިދާރާއިން ވިދާޅުވީ ހައްޔަރުކޮށްފައި ވަނީ 42 އަހަރުގެ އަންހެނަކާއި، 27 އަހަރުގެ އަންހެނަކާއި، 28 އަހަރުގެ ފިރިހެނެއް ކަމަށެވެ. މި އެންމެންނަކީވެސް ބިދޭސީންނެވެ.

ފުލުހުންގެ އިދާރާއިން ވިދާޅުވީ، އެމީހުންގެ ބަންދާއި މެދު ގޮތެއް ނިންމުމަށް ކޯޓަށް ހާޟިރު ކުރުމުން އޭގެ ތެރެއިން އެކަކު ޝަރުޠު ތަކާއި އެކު ބަންދުން ދޫކޮށްލާފައިވާ ކަމަށާއި އަނެއް ދެމީހުންގެ ބަންދަށް 15 ދުވަސް ޖަހައިދީފައިވާ ކަމަށެވެ.