ނަކަލުކޮށްފައިވާ، ނުވަތަ އަސްލާއެއްގޮތަށް ހަދާފައިވާ ވިސާއެއް ޕާސްޕޯޓުގައި ޖަހައިގެން ވެލާނާ އިންޓަނޭޝަނަލް އެއަރޕޯޓުން ފުރަން އުޅުނު ބިދޭސީއަކު ހިފަހައްޓައިފިއެވެ.

މޯލްޑިވްސް އިމިގްރޭޝަނުން އެކްސްގައި ކުރި ޕޯސްޓެއްގައި ހާމަކޮށްފައިވާ ގޮތުން، މި ބިދޭސީފަރާތް ހުއްޓުވާފައިވަނީ 22 ޖުލައި 2024 ގައެވެ. އަދި އެއަށްފަހު އެމީހާ ރާއްޖެ ނާދެވޭ ގޮތަށް ޑީޕޯޓުކޮށްފައިވާކަމަށް ވެސް އެ އިދާރާއިން ހާމަކޮށްފައިވެއެވެ.

މި މައްސަލައާ ގުޅިގެން އިތުރު މައުލޫމާތެއް އިމިގްރޭޝަނުން ހާމަކޮށްފައެއް ނުވެއެވެ.

މީގެ އިތުރުން، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތުގެ ތެރެއިން، ބުރާސްފަތި ދުވަހުގެރޭ އިމިގްރޭޝަނުން މާލޭގައި ހިންގި އޮޕަރޭޝަނުގައި 04 ތަނެއް ބަލައި ފާސްކޮށް، ގަވާއިދާ ހިލާފަށް މަސައްކަތްކުރަމުންދިއަ 16 ބިދޭސީއަކު ވަނީ ބެލުމުގެ ދަށަށް ގެންގޮސްފައެވެ.

ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީން ހޯދާ އެ ފަރާތްތައް ރާއްޖެއިން ފޮނުވާލުމުގެ މަސައްކަތް އިމިގްރޭޝަނުން މިހާރު ދަނީ ފުޅާދާއިރާއެއްގައި ކުރަމުންނެވެ.