ގްރޭޓަރ މާލެ ސަރަހައްދުގައި އެއްގަމު އުޅަނދު އާދަޔާ ޚިލާފަށް އިތުރުވުމުގެ ސަބަބުން ކުރިމަތިވެފައިވާ ޓްރެފިކްގެ ތޮއްޖެހުމަށް އެކަށީގެންވާ ހައްލެއް ހޯދައި މާލެ ސަރަހައްދުގެ މަގުތަކަކީ ހިނގާމީހުންނަށާއި އުޅަނދު ދުއްވާ ފަރާތްތަކަށް ރައްކާތެރި އަމާން ތަނަކަށް ހެދުމުގެ މަޤްޞަދުގައި "މާލެ ފަހި" ޕްރޮގްރާމް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިފުތިތާހު ކޮށްދެއްވައިފިއެވެ. 

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު "މާލެ ފަހި" ޕްރޮގްރާމް އިފުތިތާހު ކޮށްދެއްވަނީ، ފޮޓޯ: ރައީސް އޮފީސް

މި ޕްރޮގްރާމް ފެއްޓެވުމުގެ ގޮތުން ދަރުބާރުގޭގައި ބޭއްވި ހާއްސަ ރަސްމިއްޔާތުގައި ރައީސުލްޖުމްހޫރިއްޔާ ވަނީ "މާލެ ފަހި ޕްރޮގްރާމު"ގެ ފޮތް ނެރެދެއްވާފައެވެ.

މި ޕްރޮގްރާމުގައި ތިން ބައެއް ހިމެނިގެންވެއެވެ. އެއީ:

1.    ޤާނޫނާއި ޤަވާޢިދުގެ ތެރެއިން އުޅަނދު ރަޖިސްޓްރީކުރުމާއި އުޅަނދުގެ އަދަދު ކޮންޓްރޯލްކުރުން

2.    ޕަބްލިކް ޓްރާންސްޕޯޓްގެ ވަޞީލަތްތައް އިތުރަށް ހަރުދަނާކޮށް ތަރައްޤީކުރުން

3.    މަގުތަކަކީ ދަތުރުފަތުރާއި ހިނގާބިނގާވެ އުޅެން ރައްކާތެރި، ފަސޭހަ އަދި އަމާން ތަންތަނަށް ހެދުން

މި ޕްރޮގްރާމާއެކު، ގަރާޖު ސިޓީގެ ނަމުގައި ހިންގަމުން ދިޔަ ބޮޑު ޖަރީމާ ހުއްޓުމަކަށް އައިސް، ގަރާޖުގެ ވެރިފަރާތަށް ނޭންގި ގަރާޖުތަކުގައި ވެހިކަލް ރެޖިސްޓްރީ ކުރުން ނިމުމަކަށް ގެނަސް، މަގުމައްޗަކީ ބައެއް ފަރާތްތަކުން ގުދަނެއްގެ ގޮތުގައި ބޭނުންކުރާ ތަނަކަށް ހަދާފައި އޮތުން ނިމުމަކަށް ގެނަސް އަދި ވެހިކަލްގެ ލިމިޓާއި އުމުރު ކަނޑައެޅުން ހިމެނެއެވެ.

މީގެ އިތުރުން، ޑޮމެއިން ޚިދުމަތަކީ އެންމެނަށް ހޯދޭނެ ހިދުމަތަކަށް ހަދައި އޯޕަން ބިޑިން އުސޫލުން އެކަން ހިންގުމާއި އާރުޓީއެލް ބަސްތަކުގެ ސައިޒު ކުޑަކުރުން ވެސް ހިމެނެއެވެ.