އިދިކޮޅު އެންމެ ބޮޑު ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ނައިބު ރައީސަކަށް، ތުޅާދޫ ދާއިރާގެ ކުރީގެ މެންބަރު ހިސާން ޙުސައިން ޢައްޔަންކުރަން އެޕާޓީގެ ޤައުމީ މަޖިލީހުން ފާސްކޮށްފިއެވެ. ހިސާން މި މަގާމަށް އައްޔަނު ކުރުމަށް ފާސްވީ ގައުމީ މަޖިލީހުގެ އިއްތިފާގުންނެވެ.

އެމްޑީޕީގެ އަސާސީ ގަވާއިދު ބުނާގޮތުން، ޕާޓިގެ ނައިބު ރައީސަކަށް އައްޔަން ކުރާނީ އެ ޕާޓީގެ ގައުމީ މަޖިލީހުގެ ލަފަޔާއެކު ޕާޓީގެ ރައީސެވެ. އެގޮތުން ހިސާން އެ މަގާމަށް އައްޔަނުކުރުމަށް ގައުމީ މަޖިލީހަށް ފޮނުވާފައިވަނީ، ޕާޓީގެ މިހާރުގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދެވެ.

މި މަގާމަށް ހިސާން އައްޔަން ކުރުމަށް ގައުމީ މަޖިލީހުން ނިންމުމާ ގުޅިގެން އެމްޑީޕީގެ ރައީސް ޢަބްދުﷲ ޝާހިދު ވިދާޅުވީ، އެމްޑީޕީއަށާއި، އެޕާޓީގެ މެންބަރުންނަށް އިޚްލާސްތެރި ޚިދުމަތްތަކެއް ހިސާން ކުރައްވާފައިވާ ކަމަށެވެ. އަދި ހިސާންއަކީ ނައިބު ރައީސަކަށް އެންމެ އެކަށީގެންވާ ބޭފުޅާކަމަށް ދެކެވަޑައިގަންނަވާ ކަމަށްވެސް ޝާހިދު ވިދާޅުވިއެވެ.

ހިސާން ވަނީ ތުޅާދޫ ދާއިރާގެ މެންބަރުކަމުގެ އިތުރުން ޖޭއެސްސީގެ ރައީސްކަންވެސް ކުރައްވާފައެވެ.

ހިސާން މަސައްކަތްކުރައްވަމުން އަންނަނީ ފެށުނީއްސުރެން އެމްޑީޕީގައެވެ. އެގޮތުން ހިސާން އެންމެ ފުރަތަމަ ކުރެއްވީ، 2007 ގައި އެ ޕާޓީން އުފެއްދި ޝެޑޯ ކެބިނެޓުގެ ޝެޑޯ މިނިސްޓާ، ލޯ އެންޑް ޖަސްޓިސްގެ މަގާމެވެ. އޭގެ ފަހުން އެ ޕާޓީގެ ފުރަތަމަ ވެރިކަމުގައި ލީގަލް އެފެއާޒް ސެކްރެޓަރީކަން ވެސް ކުރެއްވިއެވެ.

ހިސާންގެ މަސައްކަތްތަކުގެ ތެރޭގައި ދެން އެންމެ ފާހަގަކޮށްލެވެނީ 2012 އިން 2018 އަށް އެމްޑީޕީ އިދިކޮޅުގައި އޮތް ދުވަސްވަރު ޕާޓީގެ ގިނަ އިސްވެރިން ޖަލަށްލުމުން އަދި ސަރުކާރުން ކުރިމަތިކުރި ދައުވާތަކުގެ ދިފާއުގައި ކުރެއްވި ގިނަ މަސައްކަތްތަކެވެ.

މީގެ އިތުރުން 2016 ގައި އިދިކޮޅުގައި އޭރު އޮތް ޕާޓީތަކުން އެކުވެ އުފެއްދި ޝެޑޯ ކެބިނެޓުގައި ވެސް މަސައްކަތް ކުރައްވާ ހަމަ އެ އަހަރު، އޭރު އޮތް ޕީޕީއެމްގެ ސަރުކާރާއެކު ބޭއްވި އޯލް ޕާޓީ ޓޯކްސްގައި އެމްޑީޕީ ތަމްސީލުކުރެއްވީ ވެސް ހިސާންއެވެ.