މޯލްޑިވްސް ކަސްޓަމްސް ސާވިސްގެ ކޮމިޝަނާރ ޖެނެރަލްގެ މަގާމުގައި ހުންނަވަނިކޮށް މި ހަފްތާގެ ހޯމަ ދުވަހު އެ މަގާމުން ވަކިކުރައްވައި، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ސްޓޭޓް މިނިސްޓަރަކަށް ބަދަލު ކުރެއްވި ޔޫސުފް މާނިއު މުޙައްމަދު މަގާމަށް އައްޔަންކުރިތާ ދެ ދުވަސްފަހުން އެ މަގާމުން އިސްތިއުފާ ދެއްވައިފިއެވެ.

މާނިއު އިސްތިއުފާ ދީފައިވާކަން "ނޫން" އަށް ވަނީ ކަށަވަރުވެފައެވެ. ނަމަވެސް މާނިއު މަގާމުން އިސްތިއުފާ ދެއްވީ ކޮން ސަބަބަކާ ހުރެ ކަމެއް އަދި ސާފެއް ނުވެއެވެ.

ކަސްޓަމްސްގެ ކޮމިޝަނަރ ޖެނެރަލްގެ މަގާމުން މާނިއު ވަކިކޮށްފައިވަނީ ވަރަށް ކުއްލިގޮތަކަށެވެ. އެމަނިކުފާނު އެ މަގާމުން ވަކިކުރެއްވުމަށްފަހު އެ މަގާމަށް އައްޔަންކޮށްފައިވަނީ ޑެޕިއުޓީ ކޮމިޝަނަރގެ މަގާމުގައި ހުންނެވި ފާތިމަތު ދިޔާނާއެވެ. ޑެޕިއުޓީ ކޮމިޝަނަރގެ  މަގާމަށް ދިޔާނާ އައްޔަން ކުރެއްވި އިރު ވެސް އެކަމަނާ ދިޔައީ ކަސްޓަމްސްގައި ޚިދުމަތް ކުރައްވަމުންނެވެ.