ދިވެހިރާއްޖޭގެ 59 ވަނަ މިނިދުވަހުގެ މުނާސަބަތުގައި ބާއްވަން ހަމަޖެހިފައިވާ ހަރަކާތްތަކާ ގުޅިގެން، 26 ޖުލައި 2024 ވާ ހުކުރު ދުވަހުގެ ހަވީރު 4:00 އިން 6:00 އާއި ދެމެދު މާލޭގެ މަގުތަކުގައި ވެހިކަލް ދުއްވުން މަނާވާނެއެވެ.

މިނިވަންދުވަހުގެ ހަރަކާތްތަކާ ގުޅިގެން މާލޭ ސިޓީ ކައުންސިލުން ނެރުނު އިއުލާނެއްގައި ބުނެފައިވާ ގޮތުން، މިނިވަން ދުވަހުގެ މުނާސަބަތުގައި ގައުމީ ކެޑޭޓް ކޯ އާއި މޯލްޑިވްސް ނެޝެނަލް ޑިފެންސް ފޯސްގެ ފަރާތުން މާލޭގެ ބޮޑެތި މަގުތަކުގައި ހިނގާލުމެއް ކުރިއަށް ގެއްދިއުމަށް ހަމަޖެހިފައިވާކަމަށެވެ.

އަދި އެހަރަކާތްތައް ކުރިއަށްދާ ވަގުތު މާލޭގެ މަގުތަކުގެ ޓްރެފިކް ފްލޯ މެނޭޖްކުރުމަށް ދަތިވާނެތީވެ، ކަނޑައެޅިފައިވާ ވަގުތަކީ  މާލޭގައި އެއްގަމު އުޅަނދު ދުއްވުން މަނާ ވަގުތެއްގެ ގޮތުގައި ހަމަޖައްސަވާފައިވާ ކަމަށްވެސް އެ އިއުލާނުގައި ވެއެވެ.

ގައުމީ ކެޑޭޓް ކޯ އާއި މޯލްޑިވްސް ނެޝެނަލް ޑިފެންސް ފޯސްގެ ހިނގާލުން އޮތް ނަމަވެސް، ސަރުކާރުގެ ހަރަދުތައް ކުޑަ ކުރުމުގެ ގޮތުން މި އަހަރު ފުޅަނދުބުރު ނުބާއްވާގޮތަށް ސަރުކާރުން ވަނީ ނިންމާފައެވެ.