ކޮރަޕްޝަންގެ ގިނަ ތުހުމަތުތަކަކާއެކު ބޮއްސުންލާފައިވާ އެފްއޭއެމް ހިންގުން ނޯމަލައިޒް ކޮމެޓީއަކާ ހަވާލު ކުރުމަށް ފީފާއިން ނިންމައިފިއެވެ.

މި ނޯމަލައިޒް ކޮމެޓީގެ ގޮތުގައި އައްޔަނުކުރާނެ ބަޔަކު ފީފާއިން ކަނޑައެޅުމަށް ހަމަޖެހިފައިވާއިރު، އެ ކޮމެޓީއަށް ދޭނީ 1 އަހަރު ދުވަހުގެ މުއްދަތެއްކަމަށް ފީފާ އިން ހާމަކޮށްފައިވެއެވެ. އަދި އެ ކޮމެޓީގެ ޒިންމާތައް އެ މުއްދަތުގެ ކުރިން ނިންމައިފިނަމަ، ކޮމެޓީގެ ދައުރު ނިމޭނެކަމަށް ވެސް ބުނެފައިވެއެވެ. މައްސަލަތައް ހައްލުކޮށް އެފްއޭއެމް އިންތިހާބުކޮށް ނިންމަން ޖެހޭ އެންމެ ފަހު މުއްދަތެއްގެ ގޮތުގައި އެ ކޮމިޓީ އަށް ފީފާއިން ދިނީ އަންނަ އަހަރުގެ ޖުލައި 31 ގެ ނިޔަލަށެވެ.

ފީފާއިން މިގޮތަށް ނިންމާފައިވާއިރު، އެފްއޭއެމްގެ އެކްސްކޯގެ ދައުރު ވަނީ މި މަހުގެ ދެވަނަ ދުވަހު ހަމަވެފައެވެ. ދައުރު ހަމަވިއިރު، ކުރީގެ ރައީސަކަށް ހުންނެވި ބައްސާމް އަދީލް ޖަލީލްއާ ދެކޮޅަށް ފީފާގެ މިނިވަން އެތިކްސް ކޮމިޓީން ވަނީ ނުވަ މަސް ދުވަހުގެ ސަސްޕެންޝަނެއް ކުރިމަތި ކުރުވާފައެވެ.

ނޯމަލައިޒް ކޮމެޓީއެއް އައްޔަން ކުރަން ނިންމި ނިންމުމާ ގުޅިގެން ފީފާގެ ބަޔާނުގައި އިތުރަށް ފާހަގަ ކޮށްފައިވާ ގޮތުން، ނޯމަލައިޒޭޝަން ކޮމިޓީއެއް ޔައްޔަން ކުރަން ނިންމީ އެ އެސޯސިއޭޝަން ކުރިމަތިވެފައިވާ ދޯހަޅި ހިންގުމުގެ މައްސަލަތަކުގެ އިތުރަށް މާލީ ގޮތުން ކުރިމަތިވެފައިވާ ބޮޑެތި ގޮންޖެހުންތަކަށް އަރައިގަތުމުގެ ގޮތުންނެވެ.

މި ކޮމެޓީއަށް އައްޔަން ކުރާނީ ކޮން ބައެއް ކަމެއް އަދި ފީފާއިން ހާމަކޮށްފައެއް ނުވެއެވެ.