ރަޖިސްޓްރީނުކޮށް ހުޅުމާލެ މަގުތަކުގައި ގިނަ ދުވަސްތަކެއް ވަންދެން ބަހައްޓާފައިހުރި ވެހިކަލްތައް ފުލުހުން ނަގަން ފަށައިފިއެވެ. މި މަސައްކަތް ކުރިޔަށް ގެންދަނީ ހުޅުމާލޭ ޓްރެފިކް ޕޮލިސް ޑިޕާޓްމަންޓުންނެވެ.

ހޯމަ ދުވަހު ފެށި މި މަސައްކަތުގެ ތެރެއިން ނަގަނީ ހަތަރު ފުރޮޅުލީ އުޅަނދުތަކެވެ. އެގޮތުން ހޯމަ ދުވަހު ވަނީ 10 ވެހިކަލް ފުލުހުންގެ ބެލުމުގެ ދަށަށް ގެންގޮސްފައެވެ.

އަދި ފުލުހުން ހާމަކޮށްފައިވާ ގޮތުގައި، ކުރިއަށް އޮތްދުވަސްތަކުގައި ވެސް، ރަޖިސްޓްރީނުކޮށް ހުޅުމާލޭގެ މަގުތަކުގައި ޕާކުކޮށްފައި ހުންނަ އުޅަނދުތައް ނެގުމާއި އުޅަނދު ރަޖިސްޓްރީކޮށްފައިވަނީ ގަވާއިދާ އެއްގޮތަށްތޯ ބެލުމުގެ މަސައްކަތްކުރަމުން ގެންދާނެއެވެ.

ފުލުހުން ބުނީ މި މަސައްކަތަކީ މަގުމަތީގެ ސަލާމަތާއި ރައްކާތެރިކަން ކަށަވަރުކޮށް މަގުތަކަކީ އެންމެނަށް އަމާން ރައްކާތެރި ތަނަކަށް ހެދުމަށް ކުރަމުންދާ މަސައްކަތެކެވެ. އަދި މި މަސައްކަތުގެ ތެރެއިން ސައްހަ ނޫން ރަޖިސްޓްރީ ހަދައިގެން ދުއްވާ އުޅަނދުތައް ހޯދައި ފިޔަވަޅުއެޅުމުގެ ކަންކަން ވެސް ކުރަމުން ގެންދާނެކަމަށް ފުލުހުން ހާމަކޮށްފައިވެއެވެ.