ގިނަބައެއްގެ އިތުބާރު ލިބިފައިވާ، އަދި ރާއްޖޭގެ ފުރަތަމަ ނިއުރޯސާޖަން، ޑރ. އަލީ ނިޔާފު އޭޑީކޭ އިން ވަކިވެ ވަޑައިގެން، ސަރުކާރުގެ އެންމެ ބޮޑު ހޮސްޕިޓަލް ކަމުގައިވާ، އިންދިރާ ގާންދީ މެމޯރިއަލް ހޮސްޕިޓަލްއާ (އައިޖީއެމްއެޗް) މިއަދު ގުޅިވަޑައިގެންފިއެވެ.

ޑރ. ނިޔާފު އޭޑީކޭ ދޫކުރެއްވުމާ ގުޅިގެން އެ ހޮސްޕިޓަލުން ކުރި ޕޯސްޓެއްގައި ބުނެފައިވަނީ، އޭޑީކޭގެ ނިއުރޯސާޖަރީ ޑިޕާޓްމެންޓުން ހޯދާފައިވާ ކާމިޔާބުތަކުގައި މުހިންމު ދައުރެއް އެބޭފުޅާ އަދާކުރައްވާފައިވާ ކަމަށެވެ. އަދި ނިޔާފްއަކީ އެ ޑީޕާޓްމެންޓާއި، މުޅި ހޮސްޕިޓަލަށް އަބަދުވެސް ވަރަށް ހާއްސަ މީހަކަށް ވާނެކަމަށް ވަނީ ފާހަގަކޮށްފައެވެ.

ޑރ. ނިޔާފް ވަނީ އޭޑީކޭގައި 9 އަހަރާއި 10 މަސް ދުވަހު ހިދުމަތްކުރައްވާފައެވެ.

އަދި އައިޖީއެމްއެޗާ ޑރ. ނިޔާފު މިއަދު ގުޅިވަޑައިގެންނެވުމާ ގުޅިގެން، އެ ހޮސްޕިޓަލުން ވަނީ ޑޮކްޓަރަށް މަރުހަބާ ދަންނަވާފައެވެ.