މި އަހަރުގެ ނޮވެމްބަރު 5 ވަނަ ދުވަހު އެމެރިކާގައި ބޭއްވުމަށް ހަމަޖެހިފައިވާ އެ ގައުމުގެ ރިޔާސީ އިންތިހާބުގައި ވާދަނުކުރައްވާނެކަމަށް، އެމެރިކާގެ މިހާރުގެ ރައީސް ޖޯ ބައިޑެން އިއުލާންކޮށް، ޑިމޮކްރެޓްސްގެ ރިޔާސީ ކެނޑިޑޭޓަކަށް ނައިބް ރައީސް ކަމާލާ ހެރިސް އެންޑޯޒްކޮށްފިއެވެ.

ކަމާލާ އެންޑޯޒްކުރުމަށް، އެކްސްގައި ބައިޑެން ކުރި ޕޯސްޓުގައި ބުނެފައިވަނީ، 2020 ވަނަ އަހަރު ބޭއްވި އެމެރިކާގެ ރިޔާސީ އިންތިހާބުގައި ޑިމޮކްރެޓްސްގެ ކެނޑިޑޭޓަކަށް އޭނާ ހަމަޖެހުމާއެކު، އޭނާ އެންމެ ފުރަތަމަ ނިންމި ނިންމުމަކީ ކަމާލާ ހެރިސް އޭނާގެ ރަނިން މޭޓަކަށް އައްޔަން ކުރުން ކަމަށެވެ. އަދި އެ ނިންމުމަކީ އޭނާ މިހާތަނަށް ނިންމި އެންމެ ރަގަޅު ނިންމުންކަމަށް ވެސް ބުނެފައި ވެއެވެ.

ނަމަވެސް ބައިޑެން ރިޔާސީ އިންތިހާބުގައި ވާދަނުކުރަން ނިންމިތާ ކުޑަ ވަގުތުކޮޅެއް ފަހުން، ވަކި މީހަކު އޭނާ އެންޑޯޒްކުރުމަކީ، ޕާޓީ ތެރޭގައި ދެބަސްވުންތައް ކުރިމަތިވާނެކަމެއް ކަމަށް ބެލެވެއެވެ. ސަބަބަކީ ބައިޑަން ފަހަތަށް ޖެހުމާއެކު، ޑެމޮކްރެޓްސްގެ ރިޔާސީ ޓިކެޓު ބޭނުންވާ މީހުން އެ ފުރުސަތު ބޭނުން ވާނެތީއެވެ.

ބައިޑެންގެ ބަދަލުގައި ވާދަކުރާނެ ރިޔާސީ ކެނޑިޑޭޓެއް ކަނޑައެޅުން އޮންނާނީ މި އަންނަ މަހު ޗިކާގޯގައި ބާއްވާ ޑިމޮކްރެޓިކް ނޭޝަނަލް ކޮންވެންޝަންގައި ނަގާ ވޯޓަކުންނެވެ. މި ކޮންވެންޝަންގައި އެ ޕާޓީގެ އޮފިޝަލުންނާއި އެކްޓިވިސްޓުންނާ އެކު ޖުމްލަ 4،000 ޑެލިގޭޓުން ބައިވެރިވާނެއެވެ.

އިންތިހާބުގައި ވާދަނުކުރުމަށް އުމުރުން 81 އަހަރުގެ ބައިޑެން ނިންމި އިރު، މިހާރު މިވަނީ އިންތިހާބަށް ހަތަރު މަހަށް ވުރެން ވެސް ކުޑަތަންވެފައެވެ.

ބައިޑެން އިންތިހާބުގައި ވާދަނުކުރުމަށް މި ނިންމި އެއް ސަބަބުގެ ގޮތުގައި ބެލެވެނީ، މި ދިޔަ ޖޫން މަހު އޮތް ރިޔާސީ ބަހުސްއިން ކުރިމަތިލާން ޖެހުނު ލަދުވެތިކަމާ ގުޅިގެން، އޭނާ ތަމްސީލްކުރާ ޑިމޮކްރެޓްސް އިން ވެސް އެކަމަށް ވަރަށް ބޮޑަށް ފާޑުކިޔުމުންނެވެ.