ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ ޕްރޮކިއުމަންޓް އެންޑް ލޮޖިސްޓިކް ހެޑްގެ ގޮތުގައި ހުރެ ހ. ސަމާހިލް، ހައިލަމް މުހައްމަދު ރިޝްވަތު ނެގި ކަމަށް އިއުތިރާފުވުމުން، އޭނާގެ މައްޗަށް ކުރެވުނު ތުހުމަތުތަކަށް  ޖުމްލަ 379،644 ރުފިޔާ އިން ޖޫރިމަނާކޮށް، ދައުލަތަށް ލިބުނު ގެއްލުމުގެ ބަދަލު ދިނުމަށް ކްރިމިނަލް ކޯޓުން ހުކުމްކޮށްފިއެވެ.

މި މައްސަލާގައި ހައިލަމްގެ މައްޗަށް ދައުލަތުން އުފުލާފައިވަނީ ހަތަރު ދައުވާއެކެވެ. އެއީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ތިން ދައުވާއަކާއި ރިޝްވަތު ހިފުމުގެ ދައުވާއެކެވެ.

ދައުލަތުން އޭނާގެ މައްޗަށް ކުރި ދައުވާގައި ބުނާގޮތުން، އޭނާ ވަނީ އޭނާއާ ގުޅުން އޮތް ކުންފުނިތަކަށް މަގާމުގެ ބޭނުން ނަހަމަ ގޮތުގައި ބޭނުންކޮށް، މަސައްކަތްތަކެއް ހަވާލުކޮށްފައެވެ. އެގޮތުން ޑީޖޭއޭއަށް ބޭނުންވާ އޭސީއާއި، އޭސީ މަރާމާތުގެ ހުރިހާ މަސައްކަތެއް ކުރުމަށް އެއް ބަޔަކު ހިމެނޭ ކުންފުނިތަކަކުން ކޯޓޭޝަން ހުށަހެޅުމުން، އޭނާ ވަނީ މިތަނުން އެއް ކުންފުންޏާ މަސައްކަތް ހަވާލުކޮށްފައެވެ.

އަދި މިތަނުން އެއް ކުންފުންޏެއްގެ އެކައުންޓުން ހައިލަމްގެ އެކައުންޓަށް 5،000ރ. ޖަމާކޮށްފައިވާކަމަށް ދައުލަތުން ހުށަހެޅި ދައުވާގައި ބުނެފައިވެއެވެ.

މި މައްސަލައިގައި ހައިލަމް ވަނީ ދައުލަތުން އުފުލާފައިވާ ހަތަރު ދައުވާއަށް ވެސް އިއުތިރާފުވެފައެވެ.

އެހެންކަމުން އޭނާގެ މައްޗަށް ސާބިތުވި ރިޝްވަތުގެ ދައުވާއަށް މިދިޔަ ބުރާސްފަތި ދުވަހު ކްރިމިނަލް ކޯޓުން ކަނޑައެޅި އަދަބަކީ 56،000ރ. އިން ޖޫރިމަނާކޮށް 40 ގަޑިއިރު މުޖުތަމައަށް ހިދުމަތް ކުރުމެވެ.

މީގެ އިތުރުން، މަގާމުގެ ބޭނުން ނަހަމަ ގޮތުގައި ހިފުމުގެ އަދަބެއްގެ ގޮތުގައި 82،200ރ. އިން ޖޫރިމަނާކޮށް 120 ގަޑިއިރު މުޖުތަމައަށް ހިދުމަތް ކުރުމަށް ހުކުމް ކުރިއެވެ. އަދި މިކަމުގެ ސަބަބުން ދައުލަތަށް ލިބުނު ގެއްލުމުގެ ބަދަލުގައި 241،244ރ. އިން ދެއްކުމަށް ހުކުމްކޮށްފައިވެއެވެ.

މި ހުކުމްތަކާ ގުޅިގެން، ކުރިޔަށް އޮތް ދޮޅު އަހަރުގެ ތެރޭގައި ޖުމްލަ 379،644ރ. އޭނާ ދައުލަތަށް ދައްކަންޖެހޭނެއެވެ.