ފައިނަލުގައި އިނގިރޭސީން ބަލިކޮށް، ޔޫއެފާ ޔޫރޯ ހަތަރު ވަނަ ފަހަރަށް ކާމިޔާބު ކުރުމަށްފަހު ބޭއްވި އުފާފާޅުކުރުމުގެ ހަރަކާތްތަކުގެ ތެރެއިން، ސްޕެއިންގެ ކެޕްޓަން، އަލްވާރޯ މޮރާޓާ އާއި އެ ޓީމުގެ މިޑްފީލްޑަރ، ރޮޑްރީގޯ ހެނާންޑޭޒް ކަސްކާންޓޭ (ރޮޑްރީ)، "ޗޭންޓް" ކުރި އިރު ބުނި ބަސަތަކަކުން، އެ ދެ ކުޅުންތެރިން ހޫނު ފެނަށް ވެއްޓިއްޖެއެވެ.

މައްސަލަ ފެންމަތިވީ، މި ދެ ކުޅުންތެރިން ވެސް "ޗޭންޓް" ކުރި އިރު، ސްޕެއިން އާއި އިނގިރޭސިވިލާތުގެ ދާޚިލީ މައްސަލައަކާ ގުޅޭ ގޮތުން ބަސް ބުނުމުންނެވެ. އެގޮތުން، މި ކުޅުންތެރިން ބުނެފައިވަނީ ޖިބްރާލްޓާ އަކީ ސްޕެއިންގެ ބައެއް ކަމަށެވެ.

މި މައްސަލައާ ގުޅިގެން ޔޫއެފާ އިން ބުނެފައިވަނީ، ދެ ގައުމެއްގެ ދޭތެރޭގައި އޮތް މިފަދަ މައްސަލައެއްގައި ފުޓުބޯޅަ ހަރަކާތެއްގެ ތެރެއިން ފާޑު ކިޔުމަކީ އެ އިދާރާގެ ގަވާއިދުތަކާ ހިލާފުކަމެއް ކަމަށެވެ. އަދި މި މައްސަލަ ބެލުމަށް، ޔޫއެފާގެ އެތިކްސް އެންޑް ޑިސިޕްލިނަރީ އިންސްޕެކްޓާރ އެއް ވަނީ އައްޔަންކޮށްފައެވެ. މި މައްސަލައިގައި ދެ ކުޅުންތެރިން ދެ މެޗަށް ސަސްޕެންޑު ކުރުމަކީ އެކަށީގެންވާ ކަމެއްކަމަށް، ރިޕޯޓުތައް ބުނެއެވެ.

ޖިބްރާލްޓާއަކީ ފާއިތުވި ތިން ގަރުނެއްހާ ދުވަހު ވެސް އިނގިރޭސީންގެ އިސްތިއުމާރުގައި އޮންނަ އެ ގައުމުގެ އޯވަސީސް ޓެރިޓަރީއެކެވެ. ނަމަވެސް، ޖިބްރާލްޓާ އޮންނަނީ ސްޕެއިންގެ ދެކުނު ބިތުގައެވެ. އެ ތަނަކީ ސްޕެއިންގެ ތަނަކަށް ހެދުމަށް އަބަދުވެސް އެ ގައުމުން މަސައްކަތް ކުރަމުން ދިއުމުގެ ނަތީޖާއެއްގެ ގޮތުން، އިނގިރޭސީންނާ ސްޕެއިން އޮތީ މި ތަނުގެ މައްސަލައިގައި ވަރަށް ބޮޑަށް ދެބަސްވެފައެވެ. އަދި އިނގިރޭސީން ޔޫރަޕިއަން ޔޫނިއަން (އީޔޫ) އިން ވަކިވުމާ ގުޅިގެން މި މައްސަލަ އިތުރަށް ގޯސްވެފައިވާކަމަށް ރިޕޯޓުތައް ބުނެއެވެ.