ހަ ދާއިރާއެއްގެ ކައުންސިލްތަކުގެ ބައި-އިލެކްޝަން މާލެ އާއި ރަށްރަށުގައި މިއަދު ކުރިޔަށް ގޮސްފައިވާއިރު، މީގެ ތެރެއިން ފަސް ގޮނޑި ކާމިޔާބުކޮށް، ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ބޮޑު ކާމިޔާބެއް ހޯދައިފިއެވެ.

ވަގުތީ ނަތީޖާ ދައްކާ ގޮތުން، މާލޭ ސިޓީގެ ތިން ގޮނޑި އާއި ފ. ބިލެތްދޫ ކައުންސިލުގެ ރައީސްގެ ގޮނޑިއާއި އަދި ކުޅުދުއްފުށި ސިޓީ ކައުންސިލުގެ ކުޅުދުއްފުށި އުތުރު ދާއިރާގެ ގޮނޑި ވެސް ކާމިޔާބުކުރީ ޕީއެންސީއެވެ.

އެގޮތުން ހެންވޭރު ހުޅަނގު ދާއިރާގެ ގޮނޑި ކާމިޔާބުކުރީ ފާތިމަތު ޝައުފާ ސަލީމްއެވެ. އަދި މައްޗަންގޮޅި މެދު ދާއިރާގެ ގޮނޑި ފާތިމަތު އިޝާން އަލީ ކާމިޔާބުކުރި އިރު، ހުޅުމާލެ ދާއިރާގެ ގޮނޑި ކާމިޔާބު ކުރީ އަލީ އައިމަންއެވެ. މީގެ އިތުރުން ކުޅުދުއްފުށި އުތުރު ދާއިރާގެ ގޮނޑި އިބްރާހިމް އަހުމަދު ކާމިޔާބުކުރި އިރު، ބިލެއްދޫ ކައުންސިލްގެ ރައީސްގެ ގޮނޑި ކާމިޔާބު ކުރީ އަރީހު އިސްމާއިލެވެ.

ޕީއެންސީއަށް ގެއްލިފަައިވަނީ ރ. ރަސްމާދޫ ކައުންސިލްގެ އަންހެން މެމްބަރުގެ ގޮނޑިއެވެ. އެ ގޮނޑި ކާމިޔާބުކުރީ އަމިއްލަ ގޮތުން ވާދަކުރި އައިޝަތު ޝަރަފިއްޔާއެވެ.

މި ބައި-އިލެކްޝަންގައި އެންމެ ބޮޑު އިދިކޮޅު ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް އެއްވެސް ގޮނޑިއެއް ކާމިޔާބު ކުރެވިފައެއް ނުވެއެވެ.

މިއަދު ބޭއްވި ބައި-އިލެކްޝަނަށް އެހާ ބޮޑު ތަރުހީބެއް ލިބިފައެއް ނުވެއެވެ. އެގޮތުން ހަވީރު 4 ޖެހުމާ ހަމައަށް މި ހަ ދާއިރާގައި ވޯޓުލާން ނިކުމެފައިވަނީ 3،528 މީހުންނެވެ. އެއީ ވޯޓު ލެވޭ މީހުންގެ %27 މީހުންނެވެ. މި ދާއިރާތަކަށް ޖުމްލަ 13،112 މީހުނަށް ވޯޓު ލުމުގެ ހައްގު ލިބިދައި ވެއެވެ.