އިސްރޭލުގެ ޔަހޫދީން ފަލަސްތީނުގެ ބިންތަކަށް ވެރިވެގަންނަމުން ދިއުމަކީ ޣައިރު ގާނޫނީ އަމަލެއް ކަމަށާއި، މިކަން ހުއްޓާލައި ފަލަސްތީނުގެ ބިމުން ޔަހޫދީން ނެރެންޖެހޭކަމަށް ގުޅިފައިވާ ގައުމުތަކުގެ (އ.ދ.) އެންމެ މަތީ ކޯޓު، އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އިން ބުނެފިއެވެ. އައިސީޖޭ އިން މި ގޮތަށް ނިންމާފައިވަނީ ހުކުރު ދުވަހު އޮތް އަޑުއެހުމުގައެވެ.

އައިސީޖޭގެ މި ބުނުމަކީ އިސްތިޝާރީ ލަފާ [ނުވަތަ އެޑްވައިޒަރީ އޮޕީނިއަން އެއް] ކަމަށް ވިޔަސް، މިއީ ހަމާސް ނައްތާލުމުގެ ނަމުގައި ޣައްޒާއަށް ކެނޑިނޭޅި އިޒްރޭލުން ދެމުން ގެންދާ ހަމަލާތަކާއި އެ ހަމަލާތަކުގައި އެތައް ހާސް ބައެއްގެ ފުރާނަ ގެއްލިފައިވާތީ އިޒްރޭލަށް އަމާޒުވާ ފާޑުކިޔުން އިތުރަށް ވަރުގަދަވެގެންދާނެ ނިންމުމެއް ކަމަށް ބެލެވެއެވެ.

އައިސީޖޭގެ މި ނިންމުމާ އިޒްރޭލުން ވަނީ ދެކޮޅު ހަދައިފައެވެ. އެމީހުން ބުނީ އެ ނިންމުމަކީ ހަގީގަތާ ހިލާފު ނިންމުމެއް ކަމަށެވެ. ނަމަވެސް ފަލަސްތީނުން ބުނެފައިވަނީ މިއީ ތާރީހީ ނިންމުމެއް ކަމަށެވެ.

އައިސީޖޭން ބުނީ ވަޒަންވެރިކުރުވުމުގެ ހުރިހާ ހަރަކާތެއް އިޒްރޭލުން މިހާރުން މިހާރަށް ހުއްޓާލުމަށާއި ހިފާފައިވާ ބިންތަކުގައި ވަޒަންވެރިކޮށްފައިވާ މީހުން ވެސް އެތަނުން އެ ތަންތަން ދޫކޮށް ދާންޖެހޭނެ ކަމަށެވެ.

ހުކުރު ދުވަހުގެ މި ނިންމުމަކީ ދެކުނު އެފްރިކާއިން ހުށަހެޅި މައްސަލަ ކަމުގައިވާ، އިޒޭލުން ފަލަސްތީނަށް ދޭ ނަސްލު ނައްތާލުމުގެ ހަމަލާތައް ހުއްޓުމަކަށް ގެނައުމުގެ މައްސަލައާ ތަފާތު މައްސަލައެކެވެ. މިއީ ފަލަސްތީނުގެ ބިންތައް އިޒްރޭލުން ހިފަމުން ދާތީ ހުށަހެޅި މައްސަލައާ ގުޅިގެން ނިންމި ނިންމުމެކެވެ.