ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށްފަހު އޭޑީކޭގައި ފަރުވާ ހޯއްދަވަމުން ދަނިކޮށް މިއަދު އަވަހާރަވި، ރައީސް އިބްރާޙިމް މުޙައްމަދު ޞާލިޙްގެ މަންމާފުޅު، އަލްފާޟިލާ މުއުމިއާ ހުސެއިންފުޅަކީ ރައީސް ނަޝީދުގެ ހަޔާތުގައި އެންމެ ހެޔޮ ނަސޭހަތް ދެއްވި އެއް ބޭފުޅާކަމުގައި ރައީސް ނަޝީދު ވިދާޅުވެއްޖެއެވެ. ރައީސް ނަޝީދު މިހެން ވިދާޅުވީ އެ މަނިކުފާނު އެކްސްގައި ކުރެއްވި ޕޯސްޓެއްގައެވެ.

އެ މަނިކުފާނު އިތުރަށް ފާހަގަކޮށްފައިވާ ގޮތުގައި، ރައީސް ޞާލިޙްގެ މަންމާ ފުޅަކީ އެމަނިކުފާނާ އެހާމެ ގާތް ބޭފުޅެއް ވެސް މެއެވެ.

ރައީސް ނަޝީދާއި ރައީސް ޞާލިޙްއަކީ ކުޑަ އިރުއްސުރެއް އެކީ އުޅުއްވި ދެ ރަޙްމަތްތެރިންނެވެ. ނަމަވެސް، ރައީސް ޞާލިޙްގެ ވެރިކަމުގައި ދެބޭފުޅުންގެ ދޭތެރޭގައި ވަނީ ބޮޑެތި މައްސަލަތައް ޖެހިފައެވެ.

ރައީސް ޞާލިޙްގެ މަންމާފުޅު މުއުމިނާ އަކީ އެބޭފުޅާގެ އިތުރުން ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒާއި މަޖީދިއްޔާ ސްކޫލުގެ ޕްރިންސިޕަލް އައިޝަތު މުހައްމަދު ސޯލިހާއި ރައީސް އޮފީހުގައި ރައީސުލްޖުމްހޫރިއްޔާގެ ޕާސަނަލް ސެކްރެޓަރީކަން ގިނަ އަހަރުތަކެއް ވަންދެން ކުރެއްވި ފާތިމަތު މުހައްމަދު ސޯލިހު (ފާތޭ) ގެ ވެސް މަންމާފުޅެވެ.