ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން، މި ޖުލައި މަހުގެ 16 ވަނަ ދުވަހު ދެ އެޕާޓްމެންޓަކާއި ދެ ކާރެއް ބަލާ ފާސްކޮށް، ގިނަ އަދަދެއްގެ މަސްތުވާތަކެތި ހޯދައިފިއެވެ.

ފުލުހުންގެ ޑްރަގް އެންފޯސްމަންޓާއި އިންޓެލިޖެންސް ގުޅިގެން ހިންގި އެ އޮޕަރޭޝަނުގައި ދެ ކާރުގެ އިތުރުން ދެން ބަލާފާސްކޮށްފައިވަނީ ހުޅުމާލޭގެ ދެ އެޕާޓްމެންޓެކެވެ. ނަމަވެސް މި އެޕާޓްމެންޓުތަކުގެ އެޑްރެސް ފުލުހުން ހާމަކޮށްފައެއް ނުވެއެވެ.

މި އޮޕަރޭޝަންގައި ޖުމްލަ 7 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މި މީހުނަކީ 18 އަހަރާއި 39 އަހަރާއި ދެމެދުގެ މީހުންކަމަށް ފުލުހުން ހާމަކޮށްފައިވެއެވެ. މި މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުުމުން ހަތް މީހުން ވެސް 10 ދުވަހަށް ބަންދުކުރުމަށް ވަނީ އަމުރުކޮށްފައެވެ.

އަދި މި އޮޕަރޭޝަނުގައި އެޕާޓުމެންޓުތަކުންނާއި ކާރުތަކުން ހޯދި މަސްތުވާތަކެތީގެ ބަރުދަނުގައި 1085.71 ގްރާމް ހުރި ކަމަށް ވެސް ފުލުހުން ވަނީ ހާމަކޮށްފައެވެ.