Advertisement
ރައީސް ޞާލިޙްގެ މަންމާފުޅު އަވަހާރަވެއްޖެ
ކުރީގެ ރައީސް، ރައީސް އިބްރާޙިމް މުޙައްމަދު ޞާލިޙްގެ މަންމާފުޅު، އަލްފާޟިލާ މުއުމިއާ ހުސެއިންފުޅު އަވަހާރަވެއްޖެއެވެ.
ރައީސް ޞާލިޙްގެ މަންމާފުޅު އަވަހާރަވީ، އޭޑީކޭގައި ފަރުވާ ހޯދަމުން ދަނިކޮށް މިއަދުއެވެ. ނިޔާވިއިރު، އެކަމަނާގެ އުމުރަކީ 80 އަހަރެވެ. ހަބަރު ލިބިފައިވާ ގޮތުގައި އެކަމަނާ އަވަހާރަމިވީ އާލާސްކަންފުޅާ އުޅުއްވާތާ ގިނަ ދުވަސްތަކެއްވުމަށްފަހުއެވެ.
މުއުމިނާ އަކީ އިބޫގެ އިތުރުން ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒާއި މަޖީދިއްޔާ ސްކޫލުގެ ޕްރިންސިޕަލް އައިޝަތު މުހައްމަދު ސޯލިހާއި ރައީސް އޮފީހުގައި ރައީސުލްޖުމްހޫރިއްޔާގެ ޕާސަނަލް ސެކްރެޓަރީކަން ގިނަ އަހަރުތަކެއް ވަންދެން ކުރެއްވި ފާތިމަތު މުހައްމަދު ސޯލިހު (ފާތޭ) ގެ ވެސް މަންމާފުޅެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ވަނީ ރައީސް ޞާލިޙްގެ މަންމާފުޅު އަވަހާރަވުމާ ގުޅިގެން ތައުޒިޔާ ވެސް ފޮނުވާފައެވެ.
ރައީސުލްޖުމްހޫރިއްޔާ ތަޢުޒިޔާ ވިދާޅުވެ މީސްމީޑިއާގައި ޙިއްޞާ ކުރެއްވި ޕޯސްޓްގައި އެމަނިކުފާނު ވަނީ ރައީސް ޞާލިޙްގެ ލޮބުވެތި މަންމާފުޅު މުއުމިނާ ޙުސައިންފުޅު އަވަހާރަވުމުގެ ހިތާމައިގައި ބައިވެރިވެވަޑައިގަންނަވާކަން ފާހަގަކުރައްވައި އެމަނިކުފާނުގެ ޢާއިލާއަށް ހިތުގެ އިޚްލާޞްތެރިކަމާއެކު ތަޢުޒިޔާ ދަންނަވާކަމުގައި ވިދާޅުވެފައެވެ.
