މޯލްޑިވްސް އިމިގްރޭޝަނާއި އިންޑިއާގެ ބިއުރޯ އޮފް އިމިގްރޭޝަނާއި ދެމެދު ފަހުމްނާމާއެއްގައި 24 ޖުލައި 2023 ވީ ހޯމަ ދުވަހު ސޮއިކޮށްފިއެވެ. މޯލްޑިވްސް އިމިގްރޭޝަނުން ހާމަކޮށްފައިވާ ގޮތުގައި މިއީ ދެ މުއައްސަސާގެ މަސައްކަތްތައް އިތުރަށް ހަރުދަނާކޮށް، ފުޅާކުރުމާ ގުޅޭގޮތުން ވެވުނު އެއްބަސްވުމެކެވެ.  

މިނިސްޓަރީ އޮފް ފޮރިން އެފެއާޒުގައި ކުރިޔަށްދިޔަ މި އެއްބަސްވުމުގައި ދިވެހިރާއްޖޭގެ ފަރާތުން ސޮއި ކުރެއްވީ ކޮންޓްރޯލަރ ޖެނެރަލް އޮފް މޯލްޑިވްސް އިމިގްރޭޝަން މުޙައްމަދު އަޙްމަދު ހުސައިނެވެ. އަދި އިންޑިއާގެ ފަރާތުން ސޮއި ކުރެއްވީ ޖޮއިންޓު ސެކްރަޓަރީ، މިނިސްޓަރީ އޮފް ހޯމް އެފެއަރޒް އޮފް އިންޑިއާ، ސުމާންތް ސިންގެވެ.

މި އެއްބަސްވުމުގެ ސަބަބުން އިމިގްރޭޝަންގެ މަސައްކަތްތައް އިތުރަށް ހަރުދަނާ ކުރުމަށް އެހީތެރިވާނެކަމަށް އިމިގްރޭޝަނުން ހާމަ ކޮށްފައިވެއެވެ. އިމިގްރޭޝަނުން އިތުރަށް ހާމަކޮށްފައިވާ ގޮތުގައި, މި އެއްބަސްވުމަކީ ދެޤައުމުގެ ދެމެދުގައި އިމިގްރޭޝަންގެ މަސައްކަތްތަކާ ގުޅުން ހުރި މަޢުލޫމާތު ބަދަލު ކުރުމަށާއި، ބޯޑަރ ކޮންޓްރޯލް މެނޭޖުމަންޓު އިތުރަށް ހަރުދަނާކުރުމުގެ ގޮތުން ފޯރުކޮށްދެވެން ހުރި އެހީތެރިކަން ފޯރުކޮށްދިނުމަށް ވެވުނު އެއްބަސްވުމެކެވެ. މިގޮތުން އިމިގްރޭޝަން ޚިދުމަތްތައްތަކާއި ގުޅޭގޮތުން އޮފިސަރުން ތަމްރީނު ކުރުމުގައި އިންޑިއާއިން އެހީތެރިކަން ފޯރުކޮށްދޭނެއެވެ. އަދި އިންސާނީ ވަގުފާރިއާއި އެހެނިހެން އިމިގްރޭޝަނާ ގުޅުންހުރި ކުށްތައް މަދުކުރުމަށް ބޭނުންވާ އެހީތެރިކަން ވެސް މި އެއްބަސްވުމުގެ ދަށުން ފޯރުކޮށްދޭނެކަމަށް މޯލްޑިވްސް އިމިގްރޭޝަނުން ބުނެއެވެ.

Advertisement

މިކަމަށް އަލިއަޅުވާލައި މިނިސްޓަރ އޮފް ފޮރިން އެފެއަރޒް އޮނޮރަބަލް އަބްދުٱللَّٰ ޝާޙިދު ކުރެއްވި ޓްވީޓެއްގައި ވިދާޅުވީ, މިއީ ދެ ޤައުމުގެ ކަމާ ގުޅުން ހުރި އިދާރާތަކުގެ މެދުގައި ގުޅުން ބަދަހިކުރުމަށް ލިބިގެންދާ ފުރުސަތެއްކަމަށާއި, މި އެއްބަސްވުމުގެ ސަބަބުން ދިވެހިރާއްޖޭގެ އިމިގްރޭޝަން އޮފިސަރުންގެ ޤާބިލްކަން އިތުރުކުރުމަށް ފުރުސަތުތައް ލިބިގެންދާނެ ކަމަށެވެ.