މިއަދަށް ތާވަލުކުރި، ގެދޮރުވެރިޔާ ފްލެޓު މައްސަލައިގެ ކޮމިޓީ ބައްދަލުވުމަށް ހައުސިންގް މިނިސްޓަރު އަލީ ހައިދަރު ވަޑައިނުގެންނެވިއެވެ. އަދި "ނޫން" އަށް އެނގިފައިވާ ގޮތުގައި މިނިސްޓަރ ހާޒިރުނުވާކަން ކުރިން އަންގާފައެއް ވެސް ނުވެއެވެ.

މިއަދަށް ތާވަލުކޮށްފައި އޮތް ކޮމިޓީގެ އެޖެންޑާގައި އޮތީ، ގެދޮރުވެރިޔާ ސްކީމްގެ ދަށުން ފްލެޓު ލިބޭނެކަމަށް ގެޒެޓު ކުރެވިފައިވާ އެންމެހާ ފަރާތްތަކާއި، އަދި ކަމުގެ މަސްލަޙަތު އޮތް އެންމެހައި ފަރާތްތަކުގެ ފްލެޓުތައް ބާތިލު ނުކުރުމަށް އެދި ހުށަހެޅިފައިވާ ޕެޓިޝަނާ ގުޅޭގޮތުން ހައުސިންގ މިނިސްޓްރީގެ ބޭފުޅުންނާ މަޝްވަރާ ކުރުމެވެ. މި މައްސަލައާ ގުޅިގެން މަޖިލީހުގެ ކޮމެޓީއިން ބޭނުންވީ، މި ކަމާއި ގުޅުން ހުރި އެންމެހައި ފަރާތްތަކާއި ބައްދަލު ކުރުމަށެވެ.

މިއަދުގެ 11:00 އަށް މަޖިލީހުގެ އިދާރާގައި އޮތް މި ބައްދަލުވުމަށް މިނިސްޓަރު ވަޑައިނުގަންނަވާކަން އެނގިގެން ދިޔައީ މެމްބަރުން ކޮމިޓީއަށް ވަޑައިގެން އިދާރީ މޭޒުން ކަންކަން ސާފު ކުރުމުންކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެފައިވެއެވެ. ހާޒިރު ނުވެވުނު ސަބަބެއް ކަމުގައި ބުނެފައިވަނީ ކެބިނެޓު ބައްދަލުވުން، ކޮމެޓީގެ ބައްދަލުވުމުގެ ގަޑިއަށް ނިމިފައި ނުވުމެވެ.

ޒިޔާދު އިތުރަށް ވިދާޅުވީ، ކެބިނެޓު ބައްދަލުވުމަކީ ކުރިޔާލައި އެނގޭނެ ކަމެއް ކަމަށާއި، އަދި އެ ބައްދަލުވުން އޮތްކަން ކުރިން އަންގަންޖެހޭނެ ކަމަށެވެ.

އަދި މީގެ އިތުރުން، މަޖިލީހުގެ ޤަވާއިދުގައި ވަޒީރަކު މަޖިލީހަށް ހާޒިރުވުމަށް ދޭން ޖެހޭ 5 ދުވަހުގެ މުއްދަތުވެސް ވަނީ ދެވިފައިކަން ޒިޔާދު ވަނީ ފާހަގަ ކޮށްފައެވެ.

މި ކޮމިޓީގައި ވާހަކަ ދެއްކެވި ޕީއެންސީގެ ބައެއް މެމްބަރުންވެސް ވިދާޅުވީ، މިކަން ހިނގާ ދިޔައީ އެންމެ ރަނގަޅަކަށް ނޫން ކަމަށާއި، މަޖިލީހުގެ ޤަވާއިދުގައި ބުނާ މުއްދަތުވެސް ވަޒީރަށް ދެވިފައިވާ ކަމަށެވެ.

މިފަދަ ހައްސާސް މައްސަލައެއްގައި ވަޑައިނުގެންނެވުމަކީ އަދި ޖަވާބުދާރީ ނުވެވުމަކީ ކަންބޮޑުވުން އޮތް ކަމެއްކަމަށް ޕީއެންސީގެ މެމްބަރުންވެސް ކޮމިޓީގައި ވިދާޅުވިއެވެ.