ވެލާނާ އިންޓަރނޭޝަނަލް އެއަރޕޯޓު، ވީއައިއޭގެ ސަލާމަތީ ކަންތައްތައް އިތުރަށް ހަރުދަނާ ކުރުމަށާއި މަސްތުވާތަކެތި އެތެރެވުމަށް ހުޅުވިފައި ހުރި ދޮރުތައް ބަންދު ކުރުމަށް އިތުރު ދެ ސެކިއުރިޓީ ޗެކްޕޯސްޓެއް ގާއިމްކޮށްފިއެވެ. މި ޗެކްޕޯސްޓްތައް ޤާއިމްކުރީ ވީއައިއޭގެ ހުޅަނގާއި އިރުމަތީ ފަރާތުގައެވެ. 

ޗެކް ޕޯސްޓްތައް ހުޅުވުމުގެ ގޮތުން ވީއޭއައިގައި އިއްޔެ ވަނީ ރަސްމިއްޔާތެއް ވެސް ބާއްވާފައެވެ. އަދި ޗެކް ޕޯސްޓްތައް ހުޅުވުމަށްފަހު ނޫސްވެރިންނަށް ދެއްވި އިންޓަވިއުއެއްގައި އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު މުހައްމަދު ވިދާޅުވީ، ޒަމާނީ ފެންވަރަށް ޤާއިމުކުރި މިޗެކް ޕޯސްޓްތަކުން އެއަރ ސައިޑަށް އަންނަ މީހުންނާއި ވަންނަ ހުރިހާ އުޅަނދު ފަހަރު އޭވިއޭޝަން ސެކިއުރިޓީން ވަރަށް ރަނގަޅަށް ބަލާނެ ކަމަށެވެ. އަދި މި ޗެކްޕޯސަޓާއެކު ކަސްޓަމްސްގެ މަސައްކަތްތަކަށް އިތުރަށް ފަސޭހަވެގެން ދާނެކަމަށް ވިދާޅުވެފައިވެއެވެ. 

އިބްރާހިމް ޝަރީފު މުހައްމަދު އިތުރަށް ވިދާޅުވީ މި ގާއިމުކުރެވުނު ދެ ޚިދުމަތާއެކު އެތެރޭގެ ސަލާމަތީ ކަންކަން ހަރުދަނާ ކުރުމަށް ސްކޭން ކުރެވޭނެ އިތުރު ނިޒާމުތައް ޤާއިމުކުރެވިގެންދިޔަ ކަމަށެވެ. 

އަދި އެއަރސައިޑުގައި ވަރަށް އަވަހަށް ލަގެޖް ބަލަހައްޓާ މެޝިނެއް ޤާއިމުކުރެވިގެންދާނެ ކަމަށެވެ. އަދި އިތުރަށް ސްކޭން ކުރެވި، ފޮށިތައް ބަލެމުގެ މަސައްކަތް ހަރުދަނާކަމާއެކު ކުރުމުގެ ފުރުސަތު ފަހިވެގެންދާނެ ކަމަށް ވެސް ވިދާޅުވިއެވެ.