ފެނަކައަށް ގެއްލުންވާ ގޮތަށް އެމްޑީޕީ ސަރުކާރުން ފަށާފައިވާ އެއްވެސް މަޝްރޫއެއް ކުރިއަށް ނުގެންދަން ނިންމައި، އެކަން ކަމާ ގުޅުން ހުރި އިދާރާތަކަށް އަންގާފައިވާނެކަމަށް، އެ ކުންފުނީގެ މެނޭޖިން ޑިރެކްޓަރު މުއާޒް ރަޝީދު ވިދާޅުވެއްޖެއެވެ. މުއާޒު މިހެން ވިދާޅުވީ ޕީއެންސީ ހަރުގޭގައި އާދީއްތަ ދުވަހުގެރޭ އޮތް ޖަލްސާގައި ވާހަކަފުޅު ދައްކަވަމުންނެވެ.

މި މަސައްކަތްތަކަށް އަލިއަޅުވާލައްވައި އޭނާ ވިދާޅުވީ، އޭގެ ތެރޭގައި ނުއަގުގައި ފެނަކަ މެދުވެރިކޮށް އިމާރާތް ކުރުމަށް ހަވާލުކޮށްފައިވާ 48 އޭޓީއެމްގެ މަސައްކަތާއި، ފިޝަރީޒް މިނިސްޓްރީން ފެނަކަ މެދުވެރިކޮށް ނުވަ އައިސް ޕްލާންޓް އަޅަން ހަވާލުކޮށްފައިވާ މަސައްކަތް ހިމެނޭ ކަމަށެވެ. އަދި ފެން ޕްލާންޓު މަޝްރޫއުގައި ފެނަކައިން އިތުރަށް ހަރަދު ކުރަންޖެހޭ ކަމަށް ވެސް މުއާޒު ފާހަގަ ކުރެއްވެވިއެވެ.

ސަރުކާރުގެ މާލީ ހާލަތު ދަށަށް ގޮސް، ޚަރަދުތައް ކުޑަ ކުރުމުގެ ވާހަކަ މިހާރު ދައްކަމުން އަންނަ އިރު، ސަރުކާރުން ބުނަމުން ދަނީ ގައުމުގެ އިގްތިޞާދީ ހާލަތު ދަށަށް ގޮސްފައިވަނީ، ކުރީގެ ރައީސް، ރައީސް އިބްރާޙިމް މުހައްމަދު ޞާލިޙުގެ ސަރުކާރުގެ ނިންމުންތަކުގެ ސަބަބުން ކަމަށެވެ. އެގޮތުން، މުއާޒު ވެސް ވަނީ އެ މޭރުމުން ވާހަކަ ކުރިޔަށް ގެންގޮސްފައެވެ.

މުއާޒު ވިދާޅުވީ އެމްޑީޕީގެ ސަރުކާރުގައި ފެނަކަ ދަރުވާލާފައި އޮތް މިންވަރު އަންދާޒާކުރި ވަރަށް ވުރެ މަތި ކަމަށާއި، މިހާތަނަށް ލިއުންތަކުން ސާފުވި އަދަދު 4.3 ބިލިއަން ރުފިޔާއަށް ވުރެ އިތުރު ކަމަށެވެ.