އިނގިރޭސި ޕްރިމިއަލީގު ކްރިސްޓަލް ޕެލެސްއަށް މެދުނުކެނޑި އަށް ސީޒަން ކުޅުމަށްފަހު, އެޓީމުގެ އެޓޭކްގައި މުހިންމު ދައުރެއް އަދާކުރަމުން ދިއަ އައިވަރީ ކޯސްޓްގެ ކުޅުންތެރިޔާ, ވިލްފްރައިޑް ޒަހާ, ތުރުކީގެ ގަލަޓަސަރާއި އަށް ބަދަލުވެއްޖެއެވެ. އެ ޓީމަށް ޒަހާ ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުން, އެއްވެސް ޓްރާންފަރ ފީ އަކާ ނުލައެވެ. ބެލެވޭ ގޮތުގައި މިއީ އެ ޓީމު މި ސީޒަނުގައި ޔޫރަޕްގެ އެންމެ ޝަރަފްވެރި މުބާރާތް ކަމުގައިވާ, ޔޫއެފާ ޗެމްޕިއަންސް ލީގު ކުޅުމަށް ވަމުންދާ ތައްޔާރީތަކުގެ ތެރެއިން ސްކޮޑަށް އިތުރު ކުރި ކުޅުންތެރިއެކެވެ.

ޒަހާ ހޯދުމުގެ ބިޑް ގަލަޓަސަރާއި އިން މި ކާމިޔާބު ކުރީ އެހެން ބޮޑެތި ކުލްބުތަކުންނާއި, ސައުދީ ލީގުގެ ހުށަހެޅުމެއް ވެސް އޭނާއަށް ލިބިފައިވަނިކޮށެވެ. އަދި ޕެލެސްގައި އިތުރަށް މަޑުކުރުވުމަށް އެ ޓީމުން ވެސް މަސައްކަތްކޮށްފައިވާކަމަށް ހަބަރުތައް ބުނެއެވެ. އެގޮތުން ޕެލެސްއިން ވަނީ ހަފްތާއަކު 20,000 ޕައުންޑުގެ މުސާރައެއް ހުށަހަޅާފައެވެ.

ޒަހާ އޭނާގެ ޕްރޮފެޝަނަލް ކެރިއަރ ފަށާފައިވަނީ 2010 ވަނަ އަހަރު ކްރިސްޓަލް ޕެލެސް އިންނެވެ. އަދި 2013 ވަނަ އަހަރު މެންޗެސްޓަރ ޔުނައިޓެޑަށް ބަދަލުވުމުގެކުރިން, އެ ޓީމަށް 110 މެޗު ކުޅެދީ 12 ގޯލު ކާމިޔާބު ކުރިއެވެ. މެންޗެސްޓަރ ގައި އެހާ އެދެވޭ ކުޅުމެއް ނުކުޅެވި, ހަމަ އެ އަހަރު މެންޗެސްޓަރ އިން އޭނާ ކްރިސްޓަލް ޕެލެސްއަށް ލޯނު އެއްބަސްވުމެއްގެ ދަށުން ދޫކުރިއެވެ. އަދި މި މުއްދަތު ނިމުމުން ޒަހާ ވަނީ ދާއިމީކޮށް އަނެއްކާވެސް ޕެލެސްއަށް ބަދަލުވެފައެވެ. އެއީ 2015 ވަނަ އަހަރުއެވެ. އަދި އެއަށްފަހު ޒަހާ ވެގެން ގޮސްފައިވަނީ ޕެލެސްގެ މުހިންމު ކުޅުންތެރިއަކަށެވެ. މި މުއްދަތުގައި އޭނާ ވަނީ ޕެލެސްއަށް 275 މެޗު ކުޅެދީ, 67 ގޯލު ކާމިޔާބު ކޮށްފައެވެ.

Advertisement

ގަލަޓަސަރާއި އަށް ބަދަލުވިކަން އިއުލާން ކުރުމުގެ ގޮތުން ޒަހާ ވަނީ އާދިއްތަ ދުވަހުގެ ރޭ, އިންސްޓަގްރާމް މެދުވެރިކޮށް ޕެލެސްގެ ސަޕޯޓަރުންނަށް ޖަޒުބާތުން ފުރިގެންވާ މެސެޖެއް ފޮނުވާފައެވެ. އެ މެސެޖުގައި ބުނެފައިވާގޮތުން, އެނާގެ އުމުރުން 8 އަހަރުން ފެށިގެން އޭނާގެ "ސެކަންޑް ސްކިން" އަކީ ޕެލެސްގެ ޖާޒީއެވެ. އަދި އޭނާ ބޮޑުވީ ޕެލެސްގެ ސަޕޯޓަރުންގެ އަޑު އަބަދުވެސް އިވެމުން ދިޔަ ހިސާބެއްގައިކަމަށް ވިޔަސް, ޕެލެސްގެ ސަޕޯޓަރުންގެ ހުރިހާ ސަމާލުކަމެއް އޭނާއަށް ހުއްޓޭނެ ހިސާބަށް އާދެވޭނެކަމަކަށް ދުވަހަކުވެސް އޭނާ ހީކޮށްފައި ނުވާކަމަށް އެ މެސެޖުގައި ވެއެވެ.