މަގުމަތީގެ އަމާންކަމާއި ހަމަޖެހުން ޤާއިމްކުރުމަށް އެހީވުމުގެ ގޮތުން، 4 މިލިއަން އެމެރިކާ ޑޮލަރުގެ ވެހިކަލް ޖަޕާނު ސަރުކާރުން މޯލްޑިވްސް ޕޮލިސް ސަރވިސްއަށް ހަދިޔާކޮށްފިއެވެ. މިތަކެއްޗާއި ރަސްމީކޮށް ހަވާލުވުމަށް އިސްކަންދަރު ކޮށީގައި މިއަދު ވަނީ ހާއްސަ ރަސްމިއްޔާތެއް ބާއްވާފައެވެ.

ޖަޕާނު ސަރުކާރުން ފުލުހުންނަށް ހަދިޔާކުރި ވެހިކަލްތަކުގެ ތެރޭގައި ހިމެނެނީ 54 ކާރާއި 4 ވޭންއެވެ.

މި ތަކެއްޗާއި ހަވާލުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ މުޖުތަމަޢުގައި ކުށްކުރުން އިތުރުވަމުންދާއިރު، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރަންޖެހޭ މަސައްކަތްތައް މިހާރު އިހުނަށް ވުރެން އިތުރު ކުރަން ޖެހިފައިވާކަމަށާއި، އެކަންކުރެވޭނީ ރަނގަޅު ވަޞީލަތްތައް ފުލުހުންގެ ޚިދުމަތުގައި ޤާއިމްކޮށްގެންކަމަށެވެ. އެހެންކަމުން، ޖަޕާނު ސަރުކާރުން މި ހަދިޔާކުރި އުޅަނދުތަކާއެކު މަގުމަތީގެ އަމާންކަމާއި ހަމަޖެހުން ޤާއިމްކުރުމަށްކުރާ މަސައްކަތްތައް އިތުރަށް ފުޅާވެގެންދާނެކަމަށް ވިދާޅުވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޖަޕާނު ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗީ މިޑޯރީ ވިދާޅުވީ، މިއީ ނިމުމެއް ނޫން ކަމަށާއި، ކުރިޔަށް އޮތް ތާންގައި ވެސް ފުލުހުންގެ ވަސީލަތްތައް އިތުރު ކުރުމަށް މަސައްކަތް ކުރައްވާނެ ކަމަށެވެ. އެގޮތުން މެޓަލް ޑިޓެކްޓަރާއި، ލޭސަރާއި، ޕެސެންޖަރ ކްރާފްޓާއި، ރަބަރ ބޯޓު ކުރިއަށް އޮތް ތަނުގައި ހަދިޔާކުރެވޭނެކަމަށް ސަފީރު ވިދާޅުވިއެވެ.

ފުލުހުންގެ އިތުރުން ޖަޕާނު ސަރުކާރުން ގެންދަނީ ރާއްޖޭގެ އެކި ދާއިރާތަކަށް މާލީ ގޮތުންނާއި ވަޞީލަތުގެ ގޮތުންވެސް ގިނަ އެހީތަކެއް ފޯރުކޮށްދެމުންނެވެ. އެގޮތުން މިދިޔަ އަހަރުގެ ތެރޭގައި ވެސް ވަނީ އެކި މުވައްސަސާތަކަށް ވެހިކަލް ހަދިޔާކޮށްފައެވެ.