އެމެރިކާގެ ޕެންސިލްވޭނިޔާގައި ކުރިޔަށް ގެންދިޔަ ކެމްޕެއިން ހަރަކާތެއްގެ ތެރެއިން ޕޯޑިއަމްގައި ވާހަކަ ދައްކަން ހުއްޓާ މަރާލުމަށް މަސައްކަތްކުރި، އެމެރިކާގެ ކުރީގެ ރައީސް އަދި މި އަހަރުގެ ނޮވެމްބަރުގައި ބާއްވާ އެމެރިކާގެ ރިޔާސީ އިންތިހާބުގައި ރިޕަބްލިކަން ޕާޓީގެ ފަރާތުން ވާދަކުރާ ޑޮނާލްޑް ޓްރަމްޕް އަށް ހަމަލާދިނީ 20 އަހަރުގެ އެމެރިކާ މީހެއް ކަމަށާއި، އޭނާ ނިސްބަތްވަނީ ސިޔާސީ ހަރަކާތް ކުރިޔަށް ދިޔަ ޕެންސިލްވޭނިއާއަށް ކަމަށް، ސީއެންއެން އިން ރިޕޯޓުކޮށްފިއެވެ.

ސީއެންއެން އިން އެގޮތަށް ހާމަކުރި ކަމުގައި ވީނަމަވެސް، އެމެރިކާގެ ސަލާމަތީ ބާރުތަކުން ބޭއްވި ޕްރެސް ކޮންފަރެންސްގައި އޭނާގެ އެއްވެސް މައުލޫމާތެއް ހާމައެއް ނުކުރެއެވެ. ނަމަވެސް އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން، ޓްރަމްޕަށް ހަމަލާ ދިން މީހާ މަރާލެވިފައިވާކަން ވަނީ ކަށަވަރުކޮށްދީފައެވެ.

ނޫސްވެރިންގެ ބައްދަލުވުމުގައި އެފްބީއައިއިން އިތުރަށް ބުނެފައިވަނީ، ޓްރަމްޕް މަރާލުމަށް މަސައްކަތްކުރީ ކީއްވެގެންކަމެއް އަދި ދެނެގަނެވިފައިނުވާ ކަމަށެވެ. އަދި މި ހަމަލާއާ ގުޅިގެން ދެން އިތުރު ނުރައްކަލެއް ކުރިމަތި ވެދާނެ ކަމަށް ނުބެލެވޭކަމަށް ވެސް ސަލާމަތީ ބާރުތަކުން ވަނީ ބުނެފައެވެ.

ޓްރަމްޕްގެ ސިޔާސީ ހަރަކާތަށް ގޮސް ހުރި އާންމުންގެ މީހަކު ވެސް ވަނީ މި ހާދިސާގައި މަރުވެފައެވެ. އޭގެ އިތުރުން ދެ މީހަކަށް އަނިޔާވެފައިވެއެވެ.

ޓްރަމްޕަށް އަމާޒުކޮށް ބަޑިޖެހި މީހާ ހުރީ ޓްރަންޕްގެ ކެމްޕެއިން ހަރަކާތް ހިނގި ތަނުން ބޭރުގައެވެ. އޭނާ ބަޑިޖަހާފައިވަނީ އެ އިވެންޓް ކުރިޔަށްދިޔަ ތަނާ 60 މީޓަރެއްހާ ދުރުމިނުގައި ހުރި ބިލްޑިން އެއްގެ ފުރާޅުމަތިންކަމަށް ރިޕޯޓުތައް ބުނެއެވެ.