އެމެރިކާގެ ކުރީގެ ރައީސް އަދި މި އަހަރުގެ ނޮވެމްބަރުގައި ބާއްވާ އެމެރިކާގެ ރިޔާސީ އިންތިހާބުގައި ރިޕަބްލިކަން ޕާޓީގެ ފަރާތުން ވާދަކުރާ ޑޮނާލްޑް ޓްރަމްޕް، އެމެރިކާގެ ޕެންސިލްވޭނިޔާގައި ކުރިޔަށް ގެންދިޔަ ކެމްޕެއިން ހަރަކާތެއްގެ ތެރެއިން ޕޯޑިއަމްގައި ވާހަކަ ދައްކަން ހުއްޓައި ދިން ބަޑީގެ ހަމަލާއަކުން އޭނާ ސަލާމަތްވެއްޖެއެވެ. ނަމަވެސް ޓްރަމްޕްގެ ކަނާތު ކަންފަތް ވަނީ ވަޒަނުގެ ބައެއް އަމާޒުވުމުގެ ސަބަބުން ޒަހަމް ވެފައެވެ.

މި ހާދިސާ ހިނގި މަންޒަރު ފެންނަ ވީޑިއޯތަކުން ފެންނަ ގޮތުގައި، ބަޑީގެ އަޑާއެކު ޓްރަމްޕް ވަނީ އޭނާގެ ކަނާތު ކަންފަތުގައި އަތްއަޅާ، ޕޯޑިއަމްގެ ނިވަލަށް ތިރިވެފައެވެ. އަދި ހަމަ އެ ވަގުތު އެމެރިކާގެ ސީކްރެޓް ސާރވިސް އެޖެންޓުން ވަނީ ސްޓޭޖަށް އަރާ، ޓްރަމްޕް ހިމާޔަތްކޮށް، އޭނާ ވަށާލައިގެން ވެހިކަލަށް ގެންގޮސްފައެވެ. ޓްރަމްޕް ވެހިކަލަށް ދިޔައީ ހިނގާފައެވެ.

ޓްރަންޕްގެ ތަރުޖަމާނު ވަނީ އޭނާގެ ހާލު ރަގަޅުކަމަށް ހާމަކޮށްފައެވެ.

ރިޕޯޓުތައް ބުނާ ގޮތުން ޓްރަމްޕްއަށް ހަމަލާ ދޭން މަސައްކަތްކުރި މީހާކަމަށް ބެލެވޭ މީހާ މިހާރުވަނީ މަރާލާފައެވެ.

ސޯޝަލް މީޑިއާގައި ދައުރުވަމުންދާ އެހެން ވީޑިއޯއަކުން ފެންނަ ގޮތުގައި، ޓްރަމްޕްގެ ޕޯޑިއަމްއާ މާ ދުރުނޫން ހިސާބެއްގައި ހުރި ޓެންޓެއްގެ މަތީގައި ސެކިއުރިޓީ ބެލެހެއްޓުމަށް ހުރި އެމެރިކާގެ ސަލާމަތީ ބާރުތަކަށް ނިސްބަތްވާ ސްނައިޕަރަކަށް ވަނީ، ޓްރަމްޕަށް އަމާޒުކޮށް ބަޑިޖެހި މީހާ އެވަގުތު ފެނިފައެވެ. އަދި ހަމަލާދިން މީހާއަށް އަމާޒުކޮށް އޭނާ ހަމަ އެވަގުތު ބަޑި ޖެހިތަން ފެނުނެވެ. 

ޓްރަމްޕަށް އަމާޒުކޮށް ބަޑިޖެހި މީހާ ހުރީ ޓްރަންޕްގެ ކެމްޕެއިން ހަރަކާތް ހިނގި ތަނުން ބޭރުގައެވެ. އޭނާ ބަޑިޖަހާފައިވަނީ އެ އިވެންޓް ކުރިޔަށް ދިޔަތަނާ 60 މީޓަރެއްހާ ދުރުމިނުގައި ހުރި ބިލްޑިން އެއްގެ ފުރާޅުމަތިންކަމަށް ރިޕޯޓުތައް ބުނެއެވެ.