އެމެރިކާގެ ވޮޝިންޓަންގައި ޖުލައި 9 ވަނަ ދުވަހުން ފެށިގެން 11 ވަނަ ދުވަހާއި ހަމައަށް ކުރިޔަށް ދިޔަ ނޭޓޯ ސަމިޓުގެ ފަހު ދުވަހު، އެމެރިކާގެ ރައީސް ޖޯ ބައިޑަންއަށް އޮޅިގެން، ޔޫކްރެއިންގެ ރައީސް ވޮލޮޑިމީރް ޒެލެންސްކީއާ، ރަޝިއާގެ ރައީސް ވްލާޑިމީރް ޕޫޓިންގެ ނަމުން މުހާތަބު ކުރެވިއްޖެއެވެ. ރަޝިއާ އާއި ޔޫކްރެއިންގެ ހަނގުރާމަ ކުރިޔަށްދާ މިފަދަ ދަނޑިވަޅެއްގައި ބައިޑެންއަށް މިފަދަ ގޯހެއް ހެދުމުން ގިނަ ބަޔަކު ދަނީ މިކަމާ ފާޑު ކިޔަމުންނެވެ.

ޒެލެންސްކީއާ މުހާތަބުކޮށް ބައިޑަންއަށް ބުނެވުނީ، ދެން އޭނާ ޕޯޑިއަމް ހަވާލުކޮށްލާނީ ހިތްވަރާއި އަޒުމު ވަރުގަދަ ޔޫކްރެއިންގެ ރައީސް ޕޫޓިންއަށް ކަމަށެވެ.

ޒެލެންސްކީއަށް ޕޫޓިންގެ ނަމުން މުހާތަބު ކުރެވުނު ނަމަވެސް، އޭގެ ދެ ސިކުންތު ފަހުން ބައިޑަން ވަނީ އޭނާއަށް ކިޔުނު ކުށް އިސްލާހު ކޮށްފައެވެ.

ކުށް އިސްލާހު ކުރުމުގެ ގޮތުން ބައިޑެން ބުނީ، ޕްރެޒިޑެންޓު ޕޫޓިން ބަލިކުރެވޭނެ ކަމަށާއި ބައިޑެން ވެސް އެކަމަށް ވަރަށް އެދޭ ކަމަށެވެ.

މި ހާދިސާ ހިނގާފައިވަނީ ނޭޓޯ ސަމިޓުގެ ތެރެއިން ޔޫކްރެއިންގެ ސަލާމަތީ ކަންތައްތަކަށް އެހީތެރިވުމުގެ ގޮތުން، އެކަމަށް ވާގިވެރިވާ ފަރާތްތަކާއި ބައްދަލު ކުރުމަށް ބައިޑެން އިސްނަގައިގެން ކުރިޔަށް ގެންދިޔަ އިވެންޓެއްގެ ތެރެއިންނެވެ.

ބައިޑެންގެ ކޮމެންޓަށް ޖަވާބުދާރީ ވުމުގެ ގޮތުން ޒެލެންސްކީ ބުނެފައިވަނީ، ޕުޓިންއަށް ވުރެން އޭނާ ރަގަޅު ވާނެކަމަށެވެ.

އަދި އޭގެ ޖަވާބުގައި ބައިޑެން ބުނީ ޒެލެންސްކީއަކީ ޕޫޓިންއަށް ވުރެން މާ ބޮޑަށް ވެސް ރަގަޅު މީހެއް ކަމަށެވެ.

މި ފަހަކަށް އައިސް، އޭނާ ނިސްބަތްވާ ޑިޕޮކްރެޓިކް ޕާޓީގެ ގިނަ މެމްބަރުންނާއި އެ ޕާޓީއަށް ފަންޑު ކުރާ މީހުން ހިމެނޭހެން، ގިނަ ބަޔަކު އަންނަނީ ބައިޑެންއަށް ފާޑު ކިޔަމުންނެވެ. އަދި ނޮވެމްބަރުގައި އޮންނަ އިންތިހާބު ބައިޑަންއާ އެކު އެ ޕާޓީއަށް ކާމިޔާބު ކުރެވޭނެ ކަމާމެދު ގިނަ ބަޔަކު ޝައްކު ކުރެއެވެ.