ހުކުރު ދުވަހުގެރޭ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ބޭއްވި އެ ކުންފުނީގެ 2023 ވަނަ އަހަރުގެ އާންމު ޖަލްސާގައި މިދިޔަ އަހަރުގެ ފައިދާއިން ކޮންމެ ހިއްސާއަކަށް 80ރ. ބަހަން ފާސްކޮށްފިއެވެ. މިއީ ފާއިތުވެދިޔަ 17 އަހަރުގެ ތެރޭ އެސްޓީއޯގެ ހިއްސާގެ ފައިދާއަށް ބަހާ އެންމެ ބޮޑު އަދަދުކަން އެ ކުންފުނިން ފާހަގަ ކުރެއެވެ.

އަދި އެސްޓީއޯގެ ތަފާސް ހިސާބުތަކުން ދައްކާ ގޮތުން، ނިމިދިޔަ 2023 ވަނަ އަހަރަކީ އެ ކުންފުންޏަށް އެންމެ ބޮޑު ފައިދާއެއް ރެކޯޑު ކުރެވުނު އަހަރެވެ. އެގޮތުން ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި 818 މިލިއަން ރުފިޔާ އެސްޓީއޯއިން ވަނީ މިދިޔަ އަހަރު ރެކޯޑު ކޮށްފައެވެ.

އޭގެ ކުރިން 2022 ވަނަ އަހަރަށް ބަލާއިރު، އެ އަހަރު ހިއްސާއަކަށް ބަހާފައިވަނީ 77ރ. އެވެ. އަދި އެ އަހަރު ސާފު ފައިދާގެ ގޮތުގައި ލިބިފައިވަނީ 728 މިލިއަން ރުފިޔާއެވެ. އެހެންކަމުން، 2022 ވަނަ އަހަރުން 2023 ވަނަ އަހަރަށް އެ ކުންފުނިން މިވަނީ 12 އިންސައްތައިގެ ކުރިއެރުމެއް ހޯދާފައެވެ. 

މީގެ އިތުރުން އެސްޓީއޯ ގްރޫޕްގައި ހިމެނޭ ގިނަ ކުންފުނިތަކަށް ވެސް ވަނީ މިދިޔަ އަހަރު ފައިދާވެފައެވެ. އެހެންކަމުން މުޅި އެސްޓީއޯ ގްރޫޕްގެ ފައިދާ ވެސް ވަނީ ރެކޯޑު އަދަދަކަށް މައްޗަށް ގޮސްފައެވެ. އެ ކުންފުނިން ހާމަކޮށްފައިވާ ގޮތުގައި މި އަދަދު މި އަދަދު 1.1 ބިލިއަނަށް އަރައެވެ.