އެއާރ ސާވިސް ވޯލްޑް ކޮންގްރެސްގެ 7 ވަނަ ބައްދަލުވުން ރާއްޖޭގައި މިފަހަރު ބޭއްވި އިރު، މިއީ މި ކޮންގްރެސްގައި ބައިވެރިވި އޭވިއޭޝަން ދާއިރާގައި ގިނަ ދުވަސްތަކެއް ހޭދަކޮށްފައިވާ ގިނަ ބަޔަކަށް، އެމީހުންގެ ކެރިއަރުގައި ކުރެވުނު މިފަދަ އެންމެ ރަގަޅު ތަޖުރިބާކަމާއި، އަދި މިއީ އެމީހުނަށް އެންމެ ކާމިޔާބު އިވެންޓު ކަމުގައި އެމީހުން ޕާސަނަލީ ބުނެފައިވާކަމަށް، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފް ވިދާޅުވެއްޖެ އެވެ. މި ވާހަކަތައް ލަތީފާއި އެމީހުން ހިއްސާކޮށްފައިވަނީ، ކޮންގްރެސްގެ ތެރެއިން ވަކިވަކިން މީހުނާ ބައްދަލުކޮށް ދެކެވުނު ވާހަކަތަކުގެ ތެރެއިންކަމަށް ވެސް މުޖުތަބާ ވިދާޅުވިއެވެ.

ކޮންގްރެސް ނިންމާލުމަށްފަހު މުޖުތަބާ ދެއްވި އިންޓަވިއުގައި އިތުރަށް ވިދާޅުވެފައިވަނީ، ޓޫރިޒަމް މިިނިސްޓްރީ އާއި އެމްއެމްޕީއާރްސީ އަދި ދާއިރާގެ އެހެނިހެން ފަރާތްތަކާ ގުޅިގެން، ރާއްޖޭގެ ފަތުރުވެރިކަމުގެ ސިނާއަތު ކުރިއަރުވަން އަބަދުވެސް ގިނަ މަސައްކަތްތަކެއް އެމްއޭސީއެލް އިން ކުރާނެ ކަމަށެވެ.

އަދި މި ކޮންގްރެސްގެ ސަބަބުން ފަތުރުވެރިކަމުގެ ސިނާއަތުގައި އުޅޭ ދުނިޔޭގެ އެތައް ބަޔަކަށް ރާއްޖެ އިތުރަށް އިޝްތިހާރުވެގެންދާނެ ކަމަށާއި، މިއީ މާކެޓިން ބޮޑު އިވެންޓަކަށްވުމުން، ރާއްޖެއަށް ތަފާތު ގައުމުތަކުގެ އެއާލައިންތައް ގެނައުމުގަޔާއި ފަތުރުވެރިން ރާއްޖެއަށް ޝައުުގުވެރިކުރުވުމަށް އެހީތެރިވެދޭނެ ކަމަށް ވެސް މުޖުތަބާ ފާހަގަ ކުރެއްވެވިއެވެ.

މި ކޮންގްރެސްގެ ބައިވެރިންނަށް ރާއްޖޭގެ ވައިގެ ސިނާއަތް ކުރިއަށްދާ ގޮތުގެ މައުލޫމާތާއި އެ ސިނާއަތް ކުރިއެރުވުމަށް ކުރެވޭ މަސައްކަތްތައް ވަނީ ކިޔާދީގައެވެ. މިއާއިއެކު މި ކޮންގްރެސްގެ ސަބަބުން މިދާއިރާ އިތުރަށް ތަރައްޤީކުރުމަށް ސަރުކާރާއި އަމިއްލަ ފަރާތްތަކުން ކުރަމުން އަންނަ މަސައްކަތްތަށް އިތުރު ފުރުސަތުތަކެއް ވަނީ ފަހިވެގެން ގޮސްފައެވެ. އަދި ވިޔާފާރީގެ ގުޅުންތައް އުފެދި ވިޔަފާރިތައް ފުޅާކުރުމުގެ ފުރުސަތުތައް ވަނީ ބައިވެރިންނަށް ލިބިގެން ގޮސްފައެވެ.

މިމަހު 9 އިން 11 އަށް ކުރުނބާ މޯލްޑިވްސް، ޝެރެޓަން މޯލްޑިވްސް ފުލްމޫން ރިސޯޓް އެންޑް ސްޕާ، އަދި ސައި ލެގޫންގައި ކުރިއަށް ގެންދިޔަ މި ކޮންގްރެސް އަކީ ގްލޯބަލް ޓްރެވަލް އިންވެސްޓްމެންޓުން އިންތިޒާމްކުރާ ބައިނަލްއަގްވާމީ ހަރަކާތެކެވެ. މިއިވެންޓް ރާއްޖޭގައި ބާއްވާފައިވަނީ މޯލްޑިވްސް އެއަރޕޯޓްސް ކޮމްޕެނީއާއި ގުޅިގެންނެވެ.

އެއަރ ސަރވިސް ވޯލްޑް ކޮންގްރެސްއަކީ 2010 ވަނަ އަހަރުން ފެށިގެން ވައިގެ ދަތުރުފަތުރުގެ ދާއިރާގެ  ތަފާތު ވިޔަފާރިތަކުގެ މެދުގައި ނެޓްވޯރކިންގ އާއި ވިޔަފާރި ކުރިއެރުވުމަށް ކުރިއަށްގެންދާ ބައިނަލްއަގްވާމީ ބައްދަލުވުމެކެވެ.