ވ. ބޮޑުފިނޮޅު ވިއްކާލުމާ ދެކޮޅަށް އެ އަތޮޅުގެ ކެޔޮދޫ، ތިނަދޫ، ފުލިދޫ އަދި ފެލިދޫގެ ރައްޔިތުންނާއި ފަތުރުވެރިކަމުގެ ވިޔަފާރި ކުރަމުންދާ ގިނަ އަދަދެއްގެ މީހުން ކޮޅުދިއްފުށި ފަޅުގައި އިއްޔެ މުޒާހަރާ ކުރީ، އެ ފިނޮޅަކީ އަތޮޅުގެ ޓުއަރިޒަމާ ގުޅިފައި އޮތް އެންމެ ބޮޑު އެއް ގުދުރަތީ ވަސީލަތް ކަމުގައި ވާތީއެވެ.

ތިނަދޫ ކައުންސިލުގެ ރައީސް، ޝިފާގު ހުސެއިންވިދާޅުވެފައި ވަނީ،  ބޮޑު ފިނޮޅަކީ ވ. އަތޮޅުގެ އިތުރުން، ކ. އަތޮޅާއި އަރި އަތޮޅުގެ ބައެއް ގެސްޓުހައުސްތަކާއި ރިސޯޓުތަކަށް އަންނަ ފަތުރުވެރިން ވެސް ބޭނުން ކުރާ ތަނެކެވެ. އަދި އެ ތަން ވިއްކާލުމަކީ އެ ސަރަހައްދުގެ ފަތުރުވެރިކަމަށް ލިބޭ ވަރަށް ބޮޑު ގޮންޖެހުމަކަށް ވާނެ ކަމަށެވެ. 

މި ފިނޮޅު ބޭނުން ކުރާ ފަރާތްތަކުން ހާމަ ކުރާ ގޮތުގައި، މި ފިނޮޅު އިތުރަށް މުހިންމު ވަނީ، މިއީ ހުރިހާ ދިޔަވަރެއްގައި ވެސް ބޭނުން ކުރެވޭ ފިނޮޅަކަށް ވުމުންނެވެ.

ވ. އަތޮޅު ތިނަދޫއާ 7.7 ކިލޯމީޓަރު ދުރުގައި އޮތް އެ ފިނޮޅު ވިއްކާލީ 729،000 ޑޮލަރަށް (11.2 މިލިއަން ރުފިޔާ) އަށް ރާއްޖޭގައި އެންމެ ފުޅާ ދާއިރާގެ ލޯކަލް ޓޫރިޒަމް ހިންގާ ކާނި ހޮޓެލްސްއަށެވެ. މިއީ ތިނަދޫއާ އެއް ބިތެއްގައި އޮންނަ ފިނޮޅެއް ވެސް މެއެވެ.

އެނގިފައިވާ ގޮތުގައި ސަރުކާރުން މި ފިނޮޅު ވިއްކާލުމަށް ނިންމާފައި ވަނީ ވ. އަތޮޅު ކައުންސިލާ ވެސް މަޝްވަރާ ކުރުމެއް ނެތި ކުއްލިއަކަށެވެ.

މާލެ އަތޮޅަށްފަހު، ދެން ފަތުރުވެރިކަން އެންމެ ކުރިއަރަމުން އަންނަނީ ވ އަތޮޅުގައެވެ. މި އަތޮޅުގައި 19 ރަށް ހިމެނޭއިރު، އެ އަތޮޅުގައި މީހުން ދިރިއުޅޭ ފަސް ރަށުގައި 52 ގެސްޓުހައުސް ހިންގަ އެވެ. އެނދުގެ އަދަދަށް ބަލާނަމަ މިހާރު ވެސް ފަތުރުވެރިކަމަށް ކުއްޔަށް ދޫކުރާ އެނދުގެ އަދަދު 650 އަށްވުރެ ގިނަ އެވެ. މި ތަންތަނަށް އަންނަ ހުރިހާ ފަތުރުވެރިންހެން މި ފިނޮޅަށް ޒިޔާރަތް ކުރެއެވެ.