ހައްޖުގެ އަޅުކަން އަދާކުރުމަށްފަހު އައި މީހުންނަށް ހާއްސަކޮށް ހުޅުވި ފްލޫ ކްލިނިކް މިހާރު ބަންދުކޮށްވައިވީ ނަމަވެސް، ހޮސްޕިޓަލަށް ދާއިރު ރޯގާގެ އެއްވެސް އަލާމާތެއް ހުރި ނަމަ މާސްކު އެޅުމަށް، އިންދިރާ ގާންދީ މެމޯރިއަލް ހޮސްޕިޓަލުން (އައިޖީއެމްއެޗް) އިލްތިމާސްކޮށްފިއެވެ.

އައިޖޫއެމްއެޗުން ހާމަކޮށްފައިވާ ގޮތުގައި ފްލޫ ކްލިނިކް ބަންދުކުރީ، އެ ތަނަށް ޚިދުމަތް ހޯދުމަށް އަންނަ މީހުންގެ އަދަދު މަދުވުމާ ގުޅިގެންނެވެ.

ހައްޖުގެ އަޅުކަމަކީ ގިނަ ގައުމުތަކަކުން އެތައް މިލިއަން ބަޔަކު އެއްފަހަރާ އެއްވާ އަޅުކަމެއް ކަމުން، ހައްޖުގެ އަޅުކަން ނިންމުމަށްފަހު މީހުން ރާއްޖެ އަންނަ ދުވަސްވަރަކީ ތަފާތު އެކި ރޯގާތައް ފެތުރޭ ދުވަސްވަރެކެވެ. އެހެންކަމުން މި ދުވަސްވަރަކީ މިކަމަށް ސަމާލުވާންޖެހޭ ދުވަސްވަރެއްކަމަށް ސިއްހީ މާހިރުން އަބަދުވެސް އަންނަނީ ބުނަމުންނެވެ.

މި ރޯގާތަކާ ގުޅުވައި އައިޖީއެމްއެޗްގައި ފްލޫ ކުލިނިކެއް ހުޅުވީ މިދިޔަ މަހުގެ 26 ގައެވެ. އަދި ކޮންމެހެން ބޭނުންވެއްޖެ ހިނދެއްގައި މެނުވީ ހޮސްޕިޓަލަށް ޒިޔާރަތް ނުކުރުމަށް ވެސް އައިޖީއެމްއެޗުން އޭރު އިލްތިމާސްކޮށްފައިވެއެވެ.