ޖޫން 2 ވަނަ ދުވަހު، ހުރިހާ ދިވެހި ރައްޔިތުންނަށް ސިހުން ގެނުވި ޚަބަރަކީ، އެމްއެންޑީއެފްގެ ތަމްރީންތަކެއް ކުރިޔަށް ދަނިކޮށް، މިޔަރެއް ހަމަލާދިނުމުގެ ސަބަބުން، ރ. އުނގޫފާރު ނިއުލައިފް، މުޙައްމަދު ޒައިދާން (23އ) ނިޔާވި ޚަބަރެވެ.

އެ ހާދިސާއަށް މިޖުލައި މަހުގެ 2 ވަނަ ދުވަހަށް އެއްމަސް ދުވަސް ފުރުނު އިރު، އެހާދިސާ އާއި ގުޅޭ ހުރިހާ ކަމެއް އެމްއެންޑީއެފުން ވަނީ ސިއްރުކޮށްފައެވެ. ހާދިސާ ހިނގި ގޮތާއި ހާދިސާ ހިނގި ސަރަހައްދާއި، ހާދިސާގައި ޒައިދާން ނިޔާވާން ޖެހުނު ސަބަބާއި ގުޅޭ ގޮތުން މީޑިއާއިންނާއި އާއިލާއިން ކުރި ސުވާލުތަކަށްވެސް އެމްއެންޑީއެފުން ޖަވާބެއް ނުދިނެވެ. އެހެންވެ ހާދިސާ އާއި ގުޅިގެން އެމްއެންޑީއެފަށް ކުރެވޭ ތުހުމަތުތައް އޮތީ އެމްއެންޑީއެފުން ޖަވާބު ދޭން ބޭނުން ނުވާ ސުވާލުތަކެއްގެ ގޮތުގައި އަޅައި ނުލައި ދޫކޮށްލާފައެވެ.