ރަހީނު ކުރުމަށްފަހު މީހެއްގެ އިނގިލި ބުރކޮށްލި މައްސަލައެއްގައި ތިން މީހަކު ހައްޔަރުކޮށްފިއެވެ.

މި މައްސަލައިގައި ހިމެނޭ ތިން މީހުން ކުރިމިނަލް ކޯޓަށް ހާޒިރުކުރުމަށްފަހު ޝަރީއަތް ނިމެންދެން ބަންދު ކުރުމަށް ވަނީ އަމުރުކޮށްފައެވެ. މި ތިން މީހުންގެ ތެރޭގައި ހިމެނެނީ މުޅިން ވެސް ދިވެހީންނެވެ.

މާލޭގައި ހިނގާފައިވާ މި ހާދިސާގައި ހިމެނެނީ 18 އަހަރާއި 21 އަހަރާއި 23 އަހަރުގެ ފިރިހެނުންނެވެ.

ތިން މީހުން ފުލުހުން ބެލުމުގެ ދަށަށް މިހާރު ގެންގޮސްފައިވާއިރު، މި މީހުންނަށް ފުލުހުން ކުރަނީ ތިން ތުހުމަތެކެވެ. އެއީ ތޫނު ހަތިޔާރު ބޭނުންކޮށްގެން މާރާމާރީ ހިންގުމާއި، މީހެއްގެ ގައިގައި ޖެހުމާއި ހުއްދަ ނޫން ގޮތެއްގައި މީހަކު ހިފަހައްޓައިގެން ގެންގުޅުމުގެ ތުހުމަތެވެ.

މި މައްސަލައިގައި ތުހުމަތުކުރާ މީހުންގެ މައްޗަށް ކުރާ ދައުވާގައި ސީސީޓީވީ ފުޓޭޖުގެ ވީޑިއޯ ސްނެޕްޝޮޓްތަކަކާއި، އަނިޔާ ލިބުނު ފަރާތަށް ލިބިފައިވާ އަނިޔާ ފެންނަ ފޮޓޯއަކާއި ފުލުހުންގެ އިންޓެލިޖެންސް ރިޕޯޓެއް ޝަރީއަތަށް ހުށަހަޅާފައިވެއެވެ.

ދިފާއުގައި ތުހުމަތު ކުރެވޭ މީހުން ކޯޓުގައި ބުނެފައިވަނީ އެއީ ޕަވަރ ޓޫލެއް ބޭނުން ކުރަނިކޮށް އަނިޔާވި މީހާއަށް ލިބިފައިވާ އަނިޔާއެއް ކަމަށެވެ.