އެއަރ ސަރވިސް ވޯލްޑް ކޮންގްރެސްއާއެކު ރާއްޖޭގެ ވައިގެ ސިނާއަތަށް މުހިންމު ގިނަ ކަންތައްތައް މަގުފަހި ވެގެން ދާނެކަމުގައި، މި ކޮންގްރެސް މި ފަހަރު އިންތިޒާމުކުރާ މޯލްޑިވްސް އެއާޕޯޓްސް ކޮމެޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ.

މި ކޮންގްރެސްގައި ދުނިޔޭގެ އެކި ޤައުމުތަކުގެ އެއަރޕޯޓުތަކާއި، އެއަރލައިންތައް އަދި ވައިގެ ސިނާއަތުގެ އެކި ފަންތީގެ ކުންފުނިތަކުގެ އިސްމަންދޫބުންނާއި ޓުއަރިޒަމް ބޯޑުތަކުން ބައިވެރިވުމަށް ވަނީ ހަމަޖެހިފައެވެ. އެގޮތުން ދުނިޔޭގެ އެކި ސަރަހައްދުތަކުން 150 އަށްވުރެ ގިނަ މަންދޫބުން މި ކޮންފަރެންސްގައި ބައިވެރިވުމަށް ވަނީ ހަމަޖެހިފައެވެ.

މި ކޮންފަރެސްގެ ރާއްޖޭގެ ޓްރެވަލް އިންޑަސްޓްރީ ޕާޓްނަރުން މިއަދު އެމްއޭސީއެލް އިން އިއުލާންކޮށްފައިވާއިރު، ކޮންފަރެންސް ކުރިޔަށްދާނީ ވެލާނާ އިންޓަނޭޝަނަލް އެއާޕޯޓުގައެވެ. އަދި ކޮންފަރެންސްގެ އިތުރު އިވެންޓްތައް ކުރިޔަށްދާނީ ޝެރެޓަން މޯލްޑިވިސް، އަދި ކޮރޮސް ރޯޑްސްގެ ސައީ ލެގޫންގައި ކަމަށް ވެސް އެ ކުންފުނިން މައުލޫމާތުދީފައިވެއެވެ.

ވެލާނާ އިންޓަރނޭޝަނަލް އެއަރޕޯޓުން ހޮސްޓްކުރާ މިކޮންގްރެސްގެ ޓްރެވަލް އިންޑަސްޓްރީ ޕާޓްނަރުންގެ ގޮތުގައި ހަމަޖައްސާފައިވަނީ؛

·      އޭވިއާ މޯލްޑިވްސް

·      މާގިރި ހޮޓެލް

·      ސްކައިޓުއަރސް މޯލްޑިވްސް

·      ވިލާ ޓްރެވަލްސް

·      މޯލްޑިވްސް ފްލައިޓް ސަޕޯޓް

އެމްއޭސީއެލް އިން ހާމަކޮށްފައިވާ ގޮތުގައި، މި ކޮންފަރެންސް އިންތިޒާމު ކުރުމުގައި އެ ކުންފުންޏާއިއެކު ބައިވެރިވާ ފަރާތްތަކަކީ؛

·      ރިސޯޓް ޕާޓްނަރުން: ޝެރަޓަން މޯލްޑިވްސް ފުލް މޫން ރިސޯޓް އެންޑް ސްޕާ އަދި ސައީ ލެގޫން

·      ވެނޫ ޕާޓްނަރ: ކުރުނބާ މޯލްޑިވްސް

·      ޑިޖިޓަލް ޕާޓްނަރ: ދިރާގު

·      ސީޕްލޭން ޕާޓްނަރ: ޓްރާންސް މޯލްޑިވިއަން އެއަރވޭސް (ޓީ.އެމް.އޭ)

·      އެއަރލައިން ޕާޓްނަރ: އެމިރޭޓްސް އެއަރލައިން

·      އޭވިއޭޝަން ޕާޓްނަރ: މޯލްޑިވިއަން

·      މީޑިއާ ޕާޓްނަރުން: އައިލެންޑް ޗީފް، ޓްރެވަލް ޓްރޭޑް މޯލްޑިވްސް، ހޮޓެލިއަރ މޯލްޑިވްސް، ދަ އެރައިވަލް އަދި ޓްރެވަލިއުޝަން މީޑިއާ

މީގެ އިތުރުން، ކޮންފަރެންސްގެ އެންޑޯސްމަންޓް ޕާޓްނަރުންނަކީ މިނިސްޓްރީ އޮފް ޓޫރިޒަމް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އަދި މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) އެވެ.

އެއަރ ސަރވިސް ވޯލްޑް ކޮންގްރެސްއަކީ ވައިގެ ދަތުރުފަތުރުގެ ދާއިރާގެ ވިޔަފާރިތަކުގެ މެދުގައި އޮންނަ ނެޓްވޯކިން  ބައްދަލުވުމެކެވެ. މި އިންވެންޓް ފުރަތަމަ ބާއްވާފައިވަނީ 2010 ވަނަ އަހަރު އެވެ. މިއީ މިކޮންގްރެސް ބާއްވާ 7 ވަނަ ފަހަރެވެ.