ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށް ބޭނުންފުުޅުވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ވެރިކަންކުރާ ޕާޓީ ޕީއެންސީގެ ހަރުގޭގައި މިރޭ ބޭއްވި ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެއްކޮށް ބާއްވައިފިނަމަ ރައްޔިތުންގެ  ފައިސާއިން 120 މިލިޔަން ރުފިޔާ ސަލާމަތްކުރެވިގެންދާނެ ކަމަށެވެ. އެންމެ ފަހުން ބޭއްވި ރިޔާސީ އިންތިޚާބުގެ ދެބުރުގައި 180 މިލިޔަނަށްވުރެ ގިނަ ރުފިޔާ ޚަރަދުވި އިރު، މިފަހަރު ބޭއްވި މަޖިލިސް އިންތިޚާބަށް ޚަރަދުވި ފައިސާގެ އަދަދު، 120 މިލިޔަނަށް ވުރެ މަތިކަން ރައީސް ފާހަގަކުރެއްވިއެވެ. މީގެ އިތުރުން އެމަނިކުފާނު ވަނީ، ލޯކަލް ކައުންސިލް އިންތިޚާބުގެ ޚަރަދުތައް ބޮޑުކަންވެސް ފާހަގަކުރައްވާފައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، އެބަދަލު ގެނެވޭނީ ރައްޔިތުންގެ ފެންނަ ނުފެންނަ ވޯޓަކަށް ގޮސްގެން ކަމަށާއި، އެބަދަލަށް ރައްޔިތުން ތާއީދު ކުރެއްވުމަށް އެދިވަޑައިގަންނަވާކަމަށެވެ.

ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެކުގައި ބޭއްވުމުގެ ވިސްނުން މީގެ ކުރިންވެސް ސިޔާސީ ބޭބޭފުޅުން ފާޅުކުރައްވާފައިވެއެވެ. އެހެން ނަމަވެސް އެކި ސަބަބުތަކާއި ހެދި އެކަން ކުރުމަށް ސިޔާސީ ގިނަ ބޭފުޅުން އެއްބަހެއް ނޫނެވެ. ރާއްޖޭގެ ބަރުލަމާނީ ހަޔާތުން ފާއިތުވި 3 ދައުރުން ފެނިގެން ގޮސްފައި ވަނީ ރިޔާސީ އިންތިޚާބު ކާމިޔާބުކުރާ ޕާޓީއަކަށް ރައްޔިތުންގެ މަޖިލީހުގެ ސުޕަރމެޖޯރިޓީ ލިބިގެންދާ ތަނެވެ. ރިޔާސީ އިންތިޚާބުތަކުގައި މިހާތަނަށް ރައީސުލްޖުމްހޫރިއްޔާ ކަމުގެ މަޤާމަށް ބޭފުޅުން ހޮވިވަޑައިގެންފައި ވަނީ ކުޑަ ތަފާތަކުންނެވެ. އެންމެ ބޮޑު ތަފާތަކުން ވެރިކަން ލިބިވަޑައިގެންނެވީ، ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙަށެވެ.