ދުނިޔޭގެ އެކިކަންކޮޅުތަކުގައި އިންސާނުން ދިރިއުޅެމުން ދިޔަ ޤަދީމި ޒަމާނުގައިވެސް އިންސާނުންނަށް ހީކުރެވިފައި އޮތީ ދުނިޔޭގައި ދިރިއުޅޭ ބަޔަކީ ހަމައެކަނި އެބައިމީހުން ކަމަށެވެ. އެހެން ނަމަވެސް ދުނިޔޭގެ ހަޟާރަތްތައް ކުރިއަރަމުން އެއްބަޔަކަށް އަނެއް ބައެއްގެ މައުލޫމާތު އެނގެމުން އައިސް މީލާދުގެ 20 ވަނަ ޤަރުނު ނިމުނީ، ދުނިޔޭގެ ބައްރުތަކުގައި ދިރިއުޅޭ އެއްބަޔަކު އަނެއް ބަޔަކަށް ތަޢާރަފްވެގެންނެވެ.

އެހެންނަމަވެސް ޓެކްނޮލޮޖީއާއެކު 1900ގެ މެދުތެރޭގައި ފުޅާވާން ފެށި ޖައްވީ ހޯދުންތަކުގައިވެސް ޖަވާބު ހޯދަން ބޭނުންވި އެންމެ މުހިއްމު ސުވާލަކީ، މިކާއިނާތުގައި އިންސާނުންނާއި ޖަނަވާރާއި ދޫނި ސޫފާ ސޫތްޕާއި މަސްމަހާމެހި ދިރިއުޅޭ ހަމައެކަނި ޕްލެނެޓަކީ ދުނިޔެ ކަމުގެ ސުވާލެވެ. ޖައްވީ ހޯދުންތަކާއި، ކުރިއެރުންތަކުގައި، ޤަރުނެއް ނިމިދިޔައިރު، ދުނިޔެ މި ހިމެނޭ ސޯލާ ސިސްޓަމްގައި ދުނިޔެ ނޫން އެއްވެސް ޕްލެނެޓެއްގައި ދިރުމެއްވާކަމުގެ ނިޝާނެއް ނުފެނުނެވެ.

ޖައްވީ ހޯދުންތައް ހޯދުމެ މަސައްކަތުގައި ދުނިޔެ ހިމެނޭ ސޯލާސިސްޓަމް ނޫނަސް މި ޔުނިވާސްގައި އެހެން ސޯލާ ސިސްޓަމްތައް އެބަހުރިކަން ސައިންސްވެރިންނަށް ހޯދުނެވެ. އަދި 2015 ވަނަ އަހަރު ދުނިޔެއާ 120 އަލި އަހަރު ދުރުގައިވާތީ ފެނުނު ޕްލެނެޓަށް ސައިންސްވެރިންގެ ޝައުޤުވެރިކަން އިތުރުވީ، އެ ޕްލެނެޓާއި ދުނިޔެއާއި ވަރަށް އެއްގޮތް ސިފަތައް ހުރުމުންނެވެ. K2-18b ނަން ދީފައިވާ މިޕްލެނެޓްގެ އެޓްމޮސްފިއާ ނުވަތަ ޖައްވުގައި، ކާބަންޑައި އޮކްސައިޑާއި މީތޭން ގޭސް ހުރިކަން ސައިންސްވެރިންނަށް ދެނެގަނެވުނީ ހުސްވި އަހަރުގެ ސެޕްޓެމްބަރު މަހުގެ ތެރޭގައެވެ. މިއާއެކު ދުނިޔެއެކޭ އެއްގޮތަށް އެޕްލެނެޓުގައި ދިރުންތައް ވެދާނެ ކަމަށް ސައިންސްވެރިން ލަފާކުރި ކުރުމަށް އިތުރު ބާރެއް ލިބުނެވެ.

K2-18b ޕްލެނެޓް އޭގެ އިރުގެ ވަށައިގެން ބުރެއް ފުރިހަމަ ކުރަނީ، 32 ދުވަހުންނެވެ. ދުނިޔެ އިރުގެ ވަށައިގެން ބުރެ ފުރިހަމަ ކުރަނީ، 30 ނުވަތަ 31 ދުވަހުންނެވެ. ދުނިޔެކޭ އެއްގޮތަށް މިޕްލެނެޓްގައިވެސް ކަނޑުތައް ވާކަމަށްވެސް ވަނީ ބެލެވިފައެވެ.

ދުނިޔެއަށް ވުރެ ދެގުނަ ބޮޑު، މި ޕްލެނެޓްގައި ދިރުންތައް ވާކަމަށް ކުރެވޭ ހީތައް ޔަޤީނާއި ގާތްވަމުން އަންނައިރު، މިޕްލެނެޓަށް ސައިންސްވެރިންގެ ޝައުޤުވެރިކަން އަންނަނީ އިތުރުވަމުންނެވެ. އެހެން ނަމަވެސް މި ޕްލެނެޓަށް އިންސާނަކަށް ދެވުމަކީ ދުނިޔޭގެ ޓެކްނޮލޮޖީ އަދި ހުރި ހިސާބުން އަދި ވާނެ ކަމެއް ނޫނެވެ.

ކެޕްލާ 2 އާއި ދުނިޔެއާ ދެމެދު 120 އަލި އަހަރުގެ ރާސްތާއެއް އޮންނައިރު، އިންސާނެއްގެ އުމުރުން އެއަށްވުރެވެސް މާކުރެވެ.