ސަރުކާރަށް ސޯޝަލް މީޑިއާގައި ފާޑު ކިޔަމުން އަންނަ ސޯޝަލްމީޑިއާ އެކްޓިވިސްޓް، އަދި މަސްވެރިޔާ ޢަލީ ސާޖިދުގެ ބަންދުގެ މުއްދަތު އިތުރުނުކޮށް ފުލުހުން އޭނާ ދޫކޮށްލައިފިއެވެ.

ޖޫން 30 ވަނަ ދުވަހު، ފުލުހުން އޭނާ ހައްޔަރު ކުރީ، އަންހެނެއްގެ ބޮލުގައި ގާބުރިއަކުން ޖެހި ކަމުގެ ތުހުމަތުގައެވެ. އަދި އޭނާގެ ބަންދުގެ މުއްދަތު ޖެހުމަށް، ވިލިގިލީ މެޖިސްޓްރޭޓް ކޯޓަށް ހާޟިރު ކުރުމުން އެކޯޓުން ޖުލައި 1 ވަނަ ދުވަހު ވަނީ އޭނާގެ ބަންދަށް 7 ދުވަސް ޖަހައިދީފައެވެ. އެމުއްދަތު ހަމަވަނީ މިއަދަށެވެ.

ސާޖިދު ބުނިގޮތުގައި ފުލުހުންގެ ބަންދުން އޭނާ ދޫކޮށްލާފައި ވަނީ، ހައްޔަރުކުރީ ކޯޓު އަމުރެއް ނެތި ގާނޫނާ ހިލާފަށް ކަމަށެވެ. އަދި އޭނާ އެންމެ ފަހުން ހައްޔަރުކޮށްފައި ވަނީ، 2013 ވަނަ އަހަރުގައި ކަމަށާއި  ކުށުގެވެށިން ދުރުވެ ހުރީ ވަރަށް މަސައްކަތްކޮށްގެން ކަމުގައިވެސް ސޯޝަލްމީޑިއާގައި އޭނާ ބުނެފައިވެއެވެ.

ސާޖިދު ފުލުހުންގެ ބަންދުން ދޫކޮށްލި ނަަމަވެސް އެކަމާއި ގުޅޭ ގޮތުން ފުލުހުންގެ އިދާރާއިން އެއްޗެއް ބުނެފައެއް ނުވެއެވެ.

ސާޖިދުގެ މައްޗަށް ފުލުހުން ތުހުމަތުކޮށްފައި ވަނީ، 46 އަހަރުގެ އަންހެނެއްގެ ބޮލުގައި ގާބުރިއަކުން ޖެހިކަމަށެވެ. ޖޫން 29 ވަނަ ދުވަހުގެ ރޭ ދަންވަރު ހިނގި އެކަންތަކާއި ގުޅިގެން އެ އަންހެންމީހާއަށް ގއ އަތޮޅު ހޮސްޕިޓަލުގައި އެރޭ ފަރުވާ ދިނުމަށްފަހު ވަނީ ދޫކޮށްލާފައި ކަމުގައިވެސް ފުލުހުންގެ އިދާރާއިން ހާމަކޮށްފައިވެއެވެ.